Potretnan ta ilustra un drama ecologico di Aruba. Un dump di Parkietenbos plamando huma toxico sin cu ta parce di tin solucion. Desde diamars atardi habitantenan di Simeon Antonio y vecindario tabata expresa preocupacion cu tur e zonidonan di explosion cu tabatin. Y awe mainta, berdad dia a habri y a nota huma pisa riba dump. Bon Dia Aruba a tuma contacto cu Minister di Asuntonan General, esta Prome Minister Evelyn Wever Croes, kende ta encarga cu Medio Ambiente, pero no a ricibi ningun reaccion.

For di fuentenan na dump a comprende cu for di diamars atardi 6or a ricibi aviso di e personal di seguridad cu tin un candela cu a start na unda a cuminza deposita sushi e ultimo lunanan. E rand di e area aki ta exponi na aire, pues oxigeno. Debi na temperatura halto ayera, e materialnan cu ta riesgo, berdad a pega candela. A trata di domina e candela ya cu e ta hopi pega cu e mangelnan y kier scapa e vegetacion. Ayera a bolbe saca santo di e tereno riba Serā€™i Teishi pa asina purba baha e candela. E trabao a dura henter dia, pero ta mustra cu mescos cu despues cu awa a yobe, esaki a produci mas reaccion quimico y e candela pa atardi a bira mas grandi ainda. Den otro palabra, mester sigui coba santo pa asina tapa e candela.

E maneho aki pa e dump no ta uno duradero, pasobra cualkier cambio di temperatura ta pone cu e area ta core riesgo di candela y Serlimar ta pone gran parti di e poco fondo cu e tin, pa paga pa trabao di paga candela.

E potretnan ta ilustra con den oranan di mainta, prome cu yobida pisa, por a nota e cielo blauw cu e huma preto. Pero atardi cu cielo

nubla, e imagen tabata mas siniestro y ta ilustra cu sin paso concreto, dump ta keda e cancer habri di Aruba.

LEAVE A REPLY

Please enter your comment!
Please enter your name here