E aña aki Eagle Beach atrobe a ser nombra como e miho beach den Caribe den e encuesta anual di Tripadvisor Travelers’ Choice awards, marcando un logro grandi atrobe pa e beach mas popular di Aruba. Elogia pa su santo blanco y pa ta un di e miho luganan riba e isla pa mira solo baha, Eagle Beach ta keda un atraccion stima pa bishitantenan di Aruba. Na mesun momento, e beach popular aki ta birando un sitio di preocupacion unda a cuminsa mira tendencia di sobrepoblacion causa pa sobredesaroyo.

Aruba te ainda un destinacion reconoci

Esaki no ta prome biaha cu Aruba ta haya reconocemento mundial como un destinacion ideal pa vakantie. Na comienso di anja Aruba a aparece prominentemente den e lista di Tripadvisor su “Travelers’ Choice Best of the Best Destinations”, tras di Republica Dominicana. Y den e ultimo añanan e isla a ser nombra entre e top islanan na mundo pa bishita, enfatisando e posicion unico di nos baranca chikito den mundo di turismo.

Manera un usuario a nota riba website di TripAdvisor: “E ta e miho isla, e tin tur cos conteni den un espacio chikito, e awa di temperatura perfecto, santo cu ta alivia bo stress, e habitantenan, yuwananan, tur cos ta perfecto. No ta por nada nan ta yam’e ‘A Happy Island.’”

Cu e demanda di biahe internacional cu ta spera di keda fuerte durante henter 2026, e spotlight di Eagle Beach riba e lista di Tripadvisor ta señala un impulso di aun mas bishitante, sosteniendo nos economia turistico y fortaleciendo Aruba su posicion como un destinacion Caribense top.

Na mesun momento, e impulso aki por haci Eagle Beach aun mas vulnerable pa sobrepoblacion y sobredesaroyo—algo cu nos ta mirando caba.

Eagle Beach bao presion

Na 2023 caba hopi den comunidad a trece nan preocupacion tocante sobredesaroyo den cercania di Eagle Beach ora varios keho a surgi tocante trabao di construccion di un otro condominio. Turistanan mes a señala nan disgusto, enfatisando cu tanto construccion ta bay haci cu e beach publico di Eagle Beach ta bay ta demasiado yen di hende cu ya e ta bay bira dificil pa e turistanan disfruta trankilamente di e beach.

Otronan tambe a pone atencion na e presion adicional riba RWZI, y a comenta tocante e impacto cu esaki por tin ariba e problema cu tin caba di mal holo den e area aki. “Eynan e red electrico ta bay y mas holo di e awanan sushi sigui pa mas musca! Mi tin cu bay cambia mi timeshare pa un luga nobo pa mi keda,” e usuario a comenta e tempo ey.

E problema di holor den area di Eagle Beach ta algo cu tin añas ta stroba turistanan, y ta pone Aruba den mal luz. Y construccion ta loke ta pone aun mas presion ariba e planta di RWZI y locual ta ocasion e mal holor, ya cu e planta no por procesa e cantidad di awa sushi cu ta yega.

Un otro problema cu ta acompaña sobredesaroyo ta sobrepoblacion—algo cu e luna aki a haya hopi atencion riba red social. Bon Dia Aruba a reporta riba e asunto, cual a surgi despues cu activista conoci Nigel Maduro a publica un video mustrando con yen e beach tabata. E imagen di Eagle Beach a atrae hopi comentario, unda varios ciudadano y turista a lansa nan critica y expresa nan miedo pa e futuro di nos beachnan.

E imagennan di Eagle Beach tabata un recordatorio fuerte di kico nos lo por anticipa si no tuma accion concreto pa cu sobredesaroyo riba e isla. E situacion tambe a trece den mente Baby Beach; un beach cu antes tabata basta trankil pero cu awor ta plaga pa sobrepoblacion. Awor ta parce cu Eagle Beach lo ta un otro sitio cu lo bira victima di e mesun aglomeracion.

Considerando cu temporada di campamento ta yegando pronto, mester bisa cu esaki lo por empeora e problema di hende riba beach, resultado den mas sushi riba beach, problema cu palapa y menos espacio pa parkeer auto.

E cuestion di palapa ta algo cu den ultimo tempo a bira un topico particularmente controversial.

Den ultimo añanan Bon Dia Aruba a reporta varios biaha tocante kehonan cu ta surgi di turistanan pa loke ta uso di palapa unda mayoria ta confundi si nan mester paga pa palapa of no. Manera ta conoci, palapanan traha di palo riba beach ta recursonan publico pa tur hende usa, sea bo ta local of turista. Sinembargo, ta parce cu ainda tin caso di abuso ta surgi, resultando den pelea tocante ken por usa palapa of no.

Awor cu ta anticipa mas y mas bishitante riba e beach. E problema di palapa por escala, lagando su tras un sentimento di disgusto ambos pa turista y localnan.

Ademas, mester keda enfatisa e impacto ambiental cu presion creciente lo tin den e area, entre otro pa nos driekielnan famoso cu ta usa Eagle Beach como un di nan sitionan preferi pa pone webo. Cu mas contaminacion di luz, strobacion di hende y sushedad den e area, Aruba por drenta den riesgo di perde su bida salvahe—un di e caracteristicanan cu expertonan a bisa caba ta haci nos isla particularmente unico.

Y na final, tur esaki por ta conducivo na un deterioro di Eagle Beach su atraccion, cual na su turno lo menasa e imagen di “One Happy Island” cu Aruba tin añas ta promove.

Manera a pasa caba cu Baby Beach, Eagle Beach ta na punto di perde su caracteristicanan unico cu a pon’e riba lista di miho beach den Caribe. Un di e beachnan mas conoci na Aruba, conoci pa su trankilidad, bunitesa y grandura, Eagle Beach lo poco poco deteriora bao presion di aglomeracion y bira un otro joya di pueblo perdi pa sobredesaroyo.

Revisando politica, pero preguntanan ta persisti

E anuncio di minister di Turismo Wendrick Cicilia e siman aki cu gobierno lo cuminsa cu e revision di e beach policy ta un señal prometedor di loke pueblo tabata pidi p’e pa hopi tempo: Accion concreto di gobernantenan.

E revision ta dirigi na e Richtlijn Ruimtelijke Inrichting Stranden — conoci como e RRIS — e documentacion oficial di gobierno cu desde 2016 ta determina con beachnan publico di Aruba mester ser usa, dividi y protegi. Y pa prome biaha den 10 aña, e politica lo ricibi un actualisacion integral.

Cu e revision aki, algun punto lo ser atendi cune atrobe, entre otro e guianan espacial di e directiva actual. Tambe ta bay atende cu e retonan concreto di uso excesivo y saturacion di beach y ta bay introduci regulacion mas estricto y cla pa asina reduci e ambiguedad cu aña tras di aña a crea confusion y conflicto.

Aunke riba papel un movemento positivo, duda y pregunta ta persisti pasobra e frustracion cu añas di inconsistencia den aplicacion, falta di claridad tocante frontera, y operadornan cu tabata actua sin permiso adecuado a crea un cierto nivel di desconfiansa publico cu no lo desaparece inmediatamente cu un comunicado di prensa.

E modernisacion di e RRIS por ta un stap importante den e direccion corecto — pero e exito di e reforma lo ser midi finalmente no door di e anuncio, sino door di e implementacion y aplicacion den practica diario, riba cada beach, pa cada ciudadano.

Pa Eagle Beach, e ta un oportunidad pa frena e presion creciente riba e beach y kisas trece alivio na otro beachnan manera Baby Beach y Mangel Halto.