Ear plugnan ta keda necesario durante carnaval

Den cuadro di temporada di carnaval 64, Quota Club Aruba ta haci un yamada na tur carnavalistanan, musico y pueblo en general pa bira consciente y cuida nan oido for di zonido fuerte cu por afecta nan, te hasta pa resto di bo bida.

Mariela Nava-Figueroa a bisa cu semper e club aki ta trece conscientisacion riba cuido di oido muy specialmente den e periodo di carnaval. “Un biaha bo ta perde oido, bo no ta hay’e nunca mas bek.”

Decibel
Musica durante carnaval ta importante, pero aki na Aruba ta hopi duro. Nan a yega di midi e decibel di musica cu a yega di pasa 120 decibel sigur, mientras cu 80 decibel ta e nivel safe. Si bo ta oranan largo bailando tras di speaker hayando entre 100 pa 120 decibel pa oranan, e daño pa bo oido ta grandi y e ta un daño permanente.

Ademas si e zonido ta 80 decibel y bo ta keda 8 ora exponi na e nivel di zonido aki, e no ta haci bo niun daño. Pero si e ta un tiki mas, pa ehempel 84 decibel pa 4 ora, ya caba e ta cuminsa causa daño na bo oido. Cada decibel ariba 80 ta cuminsa causa daño na bo oido, segun sra. Nava-Figueroa. P’esey Quota Club hunto cu departamento di Salubridad Publico (DVG) ta bin cu e tipo di informacion aki pa conscientisa mas nos comunidad.

Como un forma di proteccion y prevencion miembronan di Quota lo ta den diferente ruta di e paradanan bendiendo ear plug, y tambe na publico cu ta bay disfruta di e paradanan. Antes e club aki tabata duna ear plugnan gratis, specialmente na e muchanan durante e paradanan. Pero nan ta conclui cu ainda ta falta conscientisacion y nan ta haya cu ora bo ta paga pa algo, bo ta bira mas consciente di uz’e cu ora bo ta hay’e gratis.

Nan tin un varios aña bendiendo ear plug nan pa 1 florin cu ta un suma simbolico, pero pa trece e conscientisacion. Nan ta pidi pa tur hende interesa pa tin nan florin den man. Tambe tin grupo di carnaval cu anualmente ta cumpra pa nan miembronan cerca Quota.

8 pa 9 mil earplug bendi
Cada aña nan ta bende alrededor di 8 mil pa 9 mil ear plug durante temporada di carnaval, y e cifra aki ta aumenta, loke ta un refleho cu e conscientisacion t’ey. Nan ta wak cu e mensahe cu nan ta hiba hunto cu WEB na scolnan ta yuda, ya cu e muchanan mes ta motiva nan mayornan pa cumpra y haci uzo di e ear plugnan.

Nan ta recomenda tur hende cu ta bay den e parada di carnaval pa no para baila direct patras di e speaker, ya cu aunke bo ta haciendo uzo di e prevencion di e ear plugnan, e no ta yuda contra e impacto di pa ehempel 120 decibel pa motibo cu ear plug nan ta tapa 20 decibel so. Kiermen bo ta haya 100 decibel, y e daño t’ey toch ya cu 80 decibel bo ta safe.

E recomendacion aki ta bay specialmente pa e muchanan pa bisti nan ear plug y pa mantene un bon distancia tras di speaker. Nan tin ear plugnan pa muchanan y tin un special riba mercado tambe, sinembargo nan ta keda vulnerabel na efecto di e zonido fuerte a pesar cu nan ta uza nan. Otro recomendacion ta pa bo man ta limpi prome cu bo ta pone e ear plugnan pa evita cualkier infeccion. Bo mester primi bon e ear plugnan pa e por fix bon aden di bo horea.

E musiconan tambe ta esun cu ta resulta mas afecta, ya cu nan ta keda oranan largo exponi na e zonido fuerte. Den pasado nan a yega di test musiconan, pero tin biaha nan tin cierto temor pa e tipo di test aki, ya cu nan no kier sa e resultado. Quota a yega di tene reunionnan cu asociacion di musiconan ya cu nan mester uza un ear plugnan special tambe. FEPO lo bin pronto cu mas splicacion ya cu cerca nan, e musico por haya e tipo di ear plugnan special aki.

You May Also Like

image.jpeg

Yabi #1 relaciona cu Siguridad di Alimento ta limpiesa​

Pa sigura cu preparacion di cuminda ta bay na un forma responsabel y na ...

23juniNG DTI.jpg

DTI : A stop trabou di construccion na Nicolaas Store

Diaranson mainta e personal di DTI a bay inspecciona e trabounan andando na Nicolaas ...

Algun scol ta habri aña escolar nobo cu mas retonan cu otronan

Ayera scolnan rond di Aruba a habri aña escolar 2017/2018 y algun tin mas ...

Artistanan local ta purba restaura simbolicamente relacionnan entre Aruba y Venezuela

Durante proceso pa prepara pa exposicion Mare Nostrum na Maracaibo, e artistanan Glenda Heyliger, ...

Argumentonan y contradiccionnan riba ley di proteccion di flora y especie marino

Departamento di Naturalesa y Medio Ambiente (DNM) kier a aclaria cu ningun momento nan ...

Si Merca ta fortifica su economia cu Trump lo tin efecto positivo pa nos turismo

Te aworaki minister di Financia, sr. Angel Bermudez no ta mira cu presidente Mericano, ...