Pa un par di simannan Ecogas no ta den operacion mas. Motibo ta cu nan no por soluciona e problema cu tin cu e calidad di gas.

E compania cu ta traha gas for di e sushi cu Ecotech ta recogi, a cuminsa cu promesanan grandi. Segun e director Freddy Kelkboom e planta hasta por a soluciona e problema di Parkietenbos den futuro. Sinembargo desde e apertura tres aña pasa e planta no a logra di yega na un produccion stabiel di e gas y finalmente no a produci e gas segun e condicionnan stipula den e contracto cu WEB.

WEB a cera un acuerdo cu Ecogas unda tambe a inverti den e pipanan cu lo mester a suministra e gas pa WEB. Asina e plan ta cu WEB lo uza e gas aki pa produci awa y coriente. Pero Bon Dia Aruba ta compronde cu te ainda Ecogas no a logra di produci gas di e calidad rekeri.

Un otro punto cu tampoco a yega di soluciona, ta e sushi cu finalmente ta keda atras ora di produci e gas. E sushi aki ta tiki pero tin concentracionnan halto di diferente material toxico den dje.

Dump ilegal
Un otro problema ta cu e sushi cu Ecotech tabata recogi na cas, no por a wordo procesa den e planta di Ecogas. Pa motibo cu e prijsnan di azeta, Ecotech no por a transporta esaki manera antes pafo y asina mester dump e sushi riba Parkietenbos.

Pero Bon Dia Aruba tin di dos fuente tambe cu Ecotech a uza dumpnan ilegal, esta na Moko y na San Nicolas pa tira nan sushi den dje. Locual ta algo cu no ta cuadra cu nan mesun reglanan y tambe certificacionnan pa calidad (ISO 9001, OHSAS 18001 en ISO 14001).

Nos redaccion a purba di haya contacto cu e compania pa diferente luna, pero te ainda no a logra.

Acuerdo cu gobierno
Aña pasa november gobierno a indica cu lo bay cera un acuerdo cu Ecotech pa asina alivia e situacion na dump Parkietenbos. E tabata forma e prome fase di e plan di gobierno pa cera e dump, asina prome minister Mike Eman a indica.

Ambos partido tabata den negociacion pa Ecotech lo tuma over e parti di recogemento di sushi. E plan tabata pa na januari nan a yega otro y e compania lo haci e trabou aki. Sinembargo despues di protesta di Serlimar, nos no ta tende nada mas di e plan. Asina e situacion no a cambia. Y ambos Serlimar y Ecotech awor ta dump nan sushi na Parkietenbos.