E tabata teribel kico Gabinete Mike Eman II a haci, esta di laga e debe nacional subi asina hopi cu practicamente a hinca Aruba den un posicion imposibel. Pero, den e prome dos añanan di Gabinete Wever Croes, no a tuma e paso drastico pa baha e debe. Y no lo por spera cu den 2021, den un aña di campaña, lo tuma e medidanan necesario tampoco pa baha e debe.

Esey ta opinion di economista Ben Marapin cu for di comienso di Status Aparte tabata manera un stem den desierto ta adverti contra e maneho di busca prestamo pa cubri gasto publico, en bes di tuma paso concreto pa baha e ultimo aki.

Bon Dia Aruba a acerca Marapin cu e pregunta si Aruba unda dia lo por baha e debe nacional, cu manera Banco Central di Aruba a mustra, a surpasa 5 biyon florin y ta mucho mas cu e Producto Interno Bruto di nos pais.

“Den e prome dos añanan di Gabinete Wever Croes berdad no a hisa e debe, pero tampoco a haci hopi pa baha esaki. E enfasis tabata riba e plan social, pero no riba con pa reduci e debe drasticamente,” Marapin a bisa Bon Dia Aruba. “Y berdad (prome cu e pandemia) cos a cuminza mehora, pero si mira cuanto placa nan a haya adicional door di a redobla e, nos mester tabata hopi miho para. P’esey no por a fia placa ningun otro caminda cu no ta Hulanda.”

Segun Marapin, Aruba mester ta pendiente kico Hulanda ta bay dicidi kico ta pasa cu su placa, si ta duna Aruba un periodo largo pa por paga e prestamo cu un cero porciento di interes. “E ora ey e ta posibel, Pero si Hulanda ta dicidi cu mester paga den un periodo mas cortico y cu interes, anto Aruba tin un problema grandi.”

BTW

Pa decadanan ta avisa Aruba cu e gasto publico ta mucho halto. No solamente tin e peso di ambtenarij, desde 2001 tin e contribucion di Pais Aruba na AZV cu tambe ta un gasto grandi. CAft, Raad van Advies di Aruba, y Hulanda pa medio di e landspakket ta mustra cada biaha riba e parti di peso enorme di gasto publico. “Nos ta gasta hopi placa, no solamente via ambtenarij, pero tambe AZV. Y nos no ta cobra locual nos mester cobra. IMF tambe a bisa esey.”

Den concepto di Marapin, Gobiernonan di Aruba tin hopi tempo ta resisti introduccion di un sistema di BTW cu ta simplifica cobranza di locual ta toca Gobierno. “Mester bin cu un BTW cu ta mas simpel, cu no ta complica. E ora ta haya mas. Y asina ta gara esnan cu ta evita di paga belasting.” Ex Minister di Finanzas Angel Bermudez mes ta kere den un ABB.

E BTW ta un Value Added Tax. Den e landspakket pa Aruba a menciona cu Aruba lo por introduci un modelo di VAT, estilo BTW manera Hulanda of un ABB. E VAT ta un omzetbelasting. E empresario ta paga e VAT na Belasting y ta cobra esaki bek na clientenan. ABB di otro banda ta a un cobranza tin na momento cu e producto ta drenta frontera. E ta un belasting cu mester reemplasa tarifa di importacion, y por inclui e BAVP, BAZV y e BBO, cu nifica cu e ta un bay ta un belasting di dos cifra.

“E punto bon di BTW of VAT ta cu tin dos control. Un comerciante cu bende su producto ta cobra e BTW cu tin cu bay pa Gobierno. Pues e comerciante mester mustra Gobierno unda el a gasta su placa y cu prueba. No por sconde locual a bende. Pasobra un cliente ta ilustra cu el a paga BTW, y Gobierno por controla si e comerciante cu a bende e producto a traspasa e placa aki.”

Placa riba caya

Desde 1986 ta tende cu hendenan no ta paga nan belasting manera mester ta y cu tin hopi placa riba caya. Gobierno lo por cobra un BTW, pero no e sumanan ficticio cu supuestamente ta riba caya. Tur Gobierno y tur Minister di Finanzas a bin ta bisa desde Status Aparte cu tin hopi placa di belasting riba caya. “Un biaha m’a bisa difunto Manchi Engelbrecht, e prome Minister di Finanzas di Aruba, pa bisa mi riba cua caya tin e placa perdi. Pasobra e storia ey ta un ‘gimmick’ (triki) di politiconan pa bisa cu tin hopi placa.”

E economista ta bisa cu ta bira ora cu ta restructura e sistema crucial, y IMF a enfatisa esaki tambe den su ultimo rapport.

Ta ora cu tur Minister di Finanzas mester lubida riba e ilusion di placa riba caya. “E problema ta cu esnan cu ta prepara e cobranza, esta esnan cu ta manda ‘aanslag’ ta djis pone un suma y despues ta bin ‘bezwaarschrift’ riba ‘bezwaarschrift’. Tin hopi caso cu comerciantenan tin rason. Pues por pone un suma cu supuestamente un comerciante mester paga, pero e no ta cuadra. E no ta e realidad.”

Den otro palabra, si ta bay tras di e suma cu Departamento di Belasting ta bisa cu tin na belasting riba caya, anto ta crea un ilusion. Y ta algo cu Minister tras di Minister a uza. Marapin ta corda di un combersacion cu un Ontvanger, Sra. Diana Croes, el a splica cu cada rato comerciantenan ta keda sin paga locual Belasting ta cobra y hasta ta asina cu nan mester haya placa bek.

Baha debe

Gobiernonan di Aruba a hisa e debe externo di Aruba te riba 90 porciento. E debe a crece exorbitante bou Gabinete Mike Eman. Awor cu Producto Bruto Nacional, GDP baha, di mes e porcentahe di debe ta bira mas grandi. Pero ta trata aki di debe di instancianan internacional cu mester paga bek, segun e acuerdo di prestamo. “Esaki no ta fianza di Hulanda, sino ta prestamo cu banconan internacional a duna. E prestamo di Hulanda a bin desde cu e pandemia a dal Aruba. E prestamo ey por yega na 30 porciento di e GDP y esey por negocia Hulanda cune. Si Hulanda dicidi dado momento cu Aruba mester paga p’e, ta nifica un problema enorme pa Aruba.”

Ben Marapin a bisa cu berdad tur hende tabata kier e placa, pero esey duna Hulanda un arma pa determina kico mester pasa. Si St. Maarten y Corsou haci dificil y bisa cu locual Hulanda ta forsa ta colonialismo, “Hulanda lo ofrece nan, nan independencia. Hulanda lo yuda nan bira independiente cu tur consecuencia.”

Gasto, medida y eleccion

Si pone tur e debenan total cu Aruba tin, y si mester paga cinco porciento na interes, ta paga 300 miyon florin tur aña na interes, sin cu ta paga debe. Esey ta un gasto. Debe no ta un gasto, pasobra si e madura por bolbe haci prestamo. Pero e interes ta locual ta pisa. “Tuma e 300 miyon florin na interes cu Gobierno mester paga tur aña, pone acerca e salarionan di ambtenaarnan, y agrega locual ta hinca na AZV, kico ta resta? Nada. Esey ta realidad di Aruba.”

E noticia sinembargo no ta completamente malo, segun Ben Marapin. Por tuma nota cu entrada di Gobierno a cuminza subi poco poco y cu economia ta recuperando cada biaha un poco mas. Pero si ta bolbe pensa cu no mester tuma paso, pasobra economia ta mehorando, anto ta mes leu for di cas.

Di otro banda, Ben Marapin ta suficientemente realistico pa realisa cu esaki lo ta exactamente kico ta bay pasa den e proximo lunanan prome cu eleccion. Pasobra a pesar di exigencianan den e landspakket y deadlines, Gobierno lo no tuma medida prome cu eleccion. E no ta bay kima su mes. “Pero e ta nifica si cu e proximo Gobierno cu sinta, si mester atende cu e problema financiero grandi aki,” ta e conclusion di economista Ben Marapin.