Durante siglo pasa, entre añanan 70 y 80, petroleo, tambe conoci como ‘oro preto’, a yuda Ecuador construi obranan di infrastructura importante: Caretera, central hidroelectrico, refineria di petroleo mas importante di e pais, scolnan, hospital, entre otro.

Awor, den pleno siglo 21, despues di 47 aña di e comienso di e prome boom petrolero, e pais Andino a inaugura, 18 di juli pasa, e produccion di e prome proyecto di mineria na gran escala: Mirador.

Cu esaki e autoridadnan y representante di e industria ta spera cu lo ta e inicio di otro proyectonan minero grandi cu lo yuda fortalece economia y desaroya poblacion deprimi den area di influencia di e proyecto.

Mirador ta ubica na provincia di Zamora Chinchipe, na Amazonia Ecuatoriano. Ta opera pa Ecuacorriente S.A (ECSA) subsidia di e consorcio Chines CRC- Tongling Nonferrus Metals, e mina tin reserva di 3,18 miyones di tonelada di koper, 3,39 miyones di ons di oro y 27,11 miyones di ons di plata.

Minister di Energia y Recurso Natural di Ecuador, Carlos Pérez, a califica e comienso di e produccion na Mirador como “un dia historico pa e pais pasobra ta inicia e produccion industrial, pa prome biaha, Ecuador ta produci koper y ta converti na exportado di mineral na escala industrial, esaki ta e comienso so di un futuro di mineria”.

Te na e momentonan aki e inversion na Mirador ta yega na 1.250 miyones dollar y e Estado Ecuatoriano a ricibi donacionnan anticipa pa mas di 85 miyones dollar.