Cu caida di Gabinete Schoof y salida di e mandatarionan di PVV, Secretario di Estado Zsolt Szabó, responsabel pa Digitalisacion y Relacionnan den Reino, tambe a confirma su salida. Ayera gobierno demisionario a anuncia cu Secretario di Estado Eddie van Marum lo tuma over e carteranan cu anteriormente Szabó tabata carga.
Manera ta conoci dia 3 di juni prome minister Dick Schoof a ofrece retiro di e ministernan di PVV den gabinete na Su Mahestad Rey Willem Alexander. E minister y secretarionan di estado di e otro partidonan di coalicion cu a keda lo continua den un gabinete demisionario te ora cu tin un gobierno nobo.
Ayera gabinete demisionario a yega un pa loke ta e reparticion nobo di e carteranan cu tabata pertenece na e minister y secretarionan di estado di e partido di coalicion PVV.
No ta mucho tempo atras Aruba a cera conoci cu e ex-Secretario di Estado Zsolt Szabó, ken a atuma over pa Alexandra van Huffelen despues cu Gabinete Rutte 4 a cay. E salida di Secretario di Estado Szabó (miembro di e partido saliente PVV) a laga e cartera di Digitalisashon y Relacionnan den Reino bashi. Awor oficialmente a bira conoci cu Secretario di Estado Van Marum (BBB), kende ya ta responsabel pa e Recuperacion di Groningen, lo asumi e cartera aki.
E division nobo di tareanan lo drenta na vigor ora cu tur minister y secretario di estado nobo a ser huramenta oficialmente pa e Su Mahestad Rey Willem Alexander. Te na e momento ey e schema di reemplaso ta na vigor ainda den cual Minister di Interior y Relacionnan den Reino ta asumi temporalmente e cartera di Digitalisacion y Relacionnan den Reino.
Den un declaracion cu Szabó a duna confirmando su salida el a expresa su tristesa pa no por continua cu e trabao, pero alabes a remarca e logronan cu el a realisa durante e casi un aña cu e tabatin como Secretario di Estado.
Szabó a comenta tocante su salida den un declaracion expresando: “Lamentablemente, mi rol como Secretario di Estado pa Digitalisacion y Relacionnan di Reino a yega na su fin. Lo mi tabata kier pa a caba e trabao aki.”
A pesar di su tristesa door di no por a termina cu su trabao, e ta satisfecho cu loke si e por a logra den e poco tempo cu e tabatin den su funcion. “Den Relacionnan di Reino, mi a enfoca riba bon gobernacion, finanzas solido di gobierno y autoconfiansa. Mi enfoke semper tabata enfoca riba un miho futuro pa e habitantenan di e parti Caribense di nos Reino.”
Segun Szabó, el a logra resultadonan concreto. A institui un fondo di seguridad di cuminda na beneficio di empresarionan riba e islanan, y tur residente di Boneiro, Sint Eustatius y Saba lo ricibi un number di servicio di ciudadano. “Mi a compromete mi mes cu mi mision cu hopi conviccion,” Szabó a bisa. “Danki na tur hende cu tabata dispuesto pa tuma pasonan hunto – pa un gobierno digital y un Reino mas fuerte.”
