Ayera a marca e prome aña di e administracion di presidente Mericano Donald Trump na mando desde cu el a asumi e presidencia dia 20 di januari 2025. Desde e tempo ey, e presidente a haci cambionan drastico cu a sacudi politica global y a forsa lidernan rond mundo pa reevalua nan dependencia riba Merca. A mira ki efecto Trump su politica di tarifa di importacion, inmigracion, ayudo y diplomacia den exterior tabatin den otro pais, incluyendo Aruba. Esaki ta kico nos a mira caba riba nos isla.
Efecto riba turismo
Na november 2025 Banco Central di Aruba (CBA) a publica un rapport titula “The Potential Impacts of U.S. Tariffs on the Aruban Economy” unda a elabora tocante e posible impacto di Trump su tarifanan riba e sector di Turismo na Aruba. E rapport ta enfatisa cu e tarifanan di importacion di Merca por tin un impacto negativo, unda e por causa un caida den poder di compra pa bishitantenan Mericano y aumento di costo pa negoshinan di turismo.
E rapport ta señala cu aunke e tarifanan no lo tin efecto directo riba servicionan di turismo, aumento den costo di bida na Merca por haci cu famianan lo por gasta entre 1.600 y 2.000 dollar mas pa aña debi na e tarifanan. Como resultado, Mericanonan lo ta menos dispuesto pa bay biaha, mucho menos pa un isla manera Aruba cu ta conoci pa ta caro.
Dato mas recien di Aruba Hotel & Tourism Association (AHATA) ta mustra cu e sector di hotel na Aruba a experencia un nivel mas abao den ocupacion, aunke entrada ta keda crece. AHATA a reporta cu e ‘average daily rate (ADR)’ a subi cu 12% den 2025, y ganashi pa cada camber disponible (RevPAR) a aumenta pa 5%. Esaki ta sugeri cu hotelnan ta combatiendo menos ocupacion por medio di cobra mas pa camber. Observadornan di industria ta nota cu e tendencia aki por refleha incertidumbre economico den cierto fuente di mercado, particularmente Merca.
Efecto riba comercio
CBA ta enfatisa cu Aruba ta hopi dependiente riba Merca como partner den comercio, unda casi 50% di importacion total ta bin di Merca. Esaki ta haci Aruba particularmente vulnerable na cambionan den prijs originando den economia Mericano.
A pesar cu te ainda no a registra ningun impacto directo riba nos comercio, hopi producto importa for di Merca ta contene input for di paisnan manera China, Canada y Mexico, cu cual Trump tabata particularmente estricto pa loke ta tarifanan di importacion. Manera e rapport ta enfatisa, ora e tarifanan subi costo di produccion na Merca, e prijsnan halto aki lo por refleha back den Aruba su importacionnan.
Pa e motibo aki, Raad van Advies den su conseho pa presupuesto di 2026 a conseha gobierno pa diversifica economia di Aruba, asina aliviando e dependencia riba e poder Norte Americano. E Conseho ta remarca cu aunke gobierno ta comprometi na diversifica e economia—incluso a traves di agricultura comercial, e economia blauw, fintech, energia renobabel, y e sector creativo—e implementacion di e plannan aki ta progresando poco poco. Aruba mester por adapta rapidamente si e efectonan di tarifanan Mericano empeora.
Efecto riba seguridad
Durante e ultimo lunanan, islanan den Caribe, specialmente esnan situa cerca di Venezuela, a mira un aumento skerpi di presencia Mericano den e region, cual a causa preocupacion tocante seguridad pa e islanan cerca. Bon Dia Aruba a reporta riba un debate den Tweede Kamer na Hulanda cu a tuma luga dia 8 di januari unda a discuti extensivamente riba e posible impacto di e operacionnan Mericano riba islanan di Reino Hulandes, particularmente Aruba, Corsou y Boneiro.
Minister Van Weel a sigura e tempo ey cu no tabatin indicacion di un menasa agudo pa seguridad di e islanan. El a bisa cu cadena di suministro, turismo y trafico aereo a sigui pa gran parti sin interupcion, fuera di un cierre temporal di espacio aereo durante e operacion di Merca. Tambe el a informa cu no tabatin fluhonan nobo di refugiado significante pa e islanan den e dianan despues di e aresto di Maduro.
No obstante, e mandatario a confirma cu a realisa planificacion extenso di emergencia den e ultimo lunanan. Esaki a inclui un coordinacion estrecho cu e gobierno y gobernantenan di e pais y teritorionan Caribense dentro di Reino, como tambe preparacionnan di parti di ministerio di Defensa y otro instancianan pa responde rapidamente si acaso e situacion bay atras. Pa loke ta si a desaroya suficiente scenario pa atende cu crisisnan potencial den futuro, incluyendo migracion na gran escala, interupcionnan na suministro di cuminda y combustibel, of aumento di actividad criminal. Minister Van Weel a contesta cu mientras cu responsabilidad pa politica di migracion ta keda principalmente cerca e paisnan autonomo di Caribe, a traha plannan den consulta cu nan pa atende situacionnan extremo.
Efecto riba fondo di ayudo pa exterior
Siguiendo cu e topico di inmigracion, manera a insinua, islanan den Caribe por mira un aumento skerpi den inmigrantenan biniendo for di Latino America. Aunke a enfatisa cu esaki no ta pasando, mester considera e capacidad di Aruba pa por atende inmigrantenan.
Riba 31 di augustus, e Agencia di Nacionnan Uni pa Refugiado, UNHCR, a stop su operacion na Aruba debi na un falta di fondo.
Na augustus 2025 Bon Dia Aruba a reporta cu no tabata solamente UNHCR cu a cera su porta, sino tambe otro agencia di migrante y refugiado, esta HIAS. UNHCR tambe a cera su oficina na Trinidad y Tobago na juli, indicando cu e falta di fondo no ta afectando solamente Aruba, sino varios pais den e region.
Pa ambos organisacion, esaki ta un impacto directo di e decision di presidente Mericano, Donald Trump, pa suspende financiamento pa organisacionnan di ayudo mundialmente. Esaki tabatin impacto rond henter mundo, y tambe na Aruba.
Den su ultimo Fact Sheet, publica na juni 2025, UNHCR a duna un bista di e cantidad enorme di deficit financiero cu tin pa cubri nan necesidadnan. Den esaki, a mustra cu tabatin apenas 17 porciento di su presupuesto cubri. Pa 2025, pa henter e region, e rekisito financiero pa UNHCR tabata $53,4 miyon, loke ta nifica cu nan tin un gap financiero di poco mas cu 44 miyon dollar. Pues ta logico cu no lo por mantene e mesun nivel di servicio na tur localidad cu un deficit financiero asina grandi.
Pues te awor por mira cu Aruba toch ta sintiendo mas e efectonan di Donald Trump su politica den exterior. Algun consecuencia tabata mas drastico cu e otro, pero loke a resalta ta cu Aruba tambe ta obliga di reevalua su posicion den asuntonan di geopolitica y capacidad pa carga su mes.
Potret di AFP.
