(AP)—Un programa di ehercicio cu a dura tres aña a mehora e probabilidad di sobrevivencia pa pashentnan cu cancer di colon y a preveni e malesa sigui desaroya, segun un estudio internacional.
Segun expertonan, cu e beneficio comparable cu cierto medicamento, centronan di cancer y plannan di seguro mester considera ehercicio como un standard nobo di cuido pa sobrevivientenan di cancer di colon. Mientras e no ta obligatorio, pashentnan por aumenta nan actividad fisico despues di tratamento, consciente cu nan ta haciendo nan parti pa preveni e cancer bolbe.
“Esaki ta un estudio sumamente emocionante,” segun Dr. Jeffrey Meyerhardt di Dana-Farber Cancer Institute, ken no tabata envolvi den e investigacion. E ta e prome ensayo controla arbitrariamente cu a mustra cu ehercicio ta reduci e probabilidad cu e cancer ta bolbe y ta mehora sobrevivencia, segun Meyerhardt.
Evidencia anterior tabata basa riba comparacion entre hende activo y hende sedentario, un tipo di estudio cu no por prueba causa y efecto. E estudio nobo—cu a tuma luga na Canada, Australia, Reino Uni, Israel y Merca—a compara hende cu a ser scogi arbitrariamente pa participa den un programa di ehercicio cu otro grupo cu a solamente ricibi un foyeto educativo.
“Esaki ta evidencia di nivel mas halto cu bo por haya,” segun Dr. Julie Gralow, medico principal di American Society of Clinical Oncology. “Mi stima e estudio aki, pasobra mi tabata promove e mesun idea aki pa hopi tempo sin evidencia asina fuerte.”
E resultadonan a ser presenta diadomingo den e reunion anual di ASCO na Chicago y publica den New England Journal of Medicine. Gruponan di investigacion academico na Canada, Australia y Reino Uni a financia e estudio.
Investigadornan a observa 889 pashent cu cancer di colon tratable cu a completa nan kimoterapia. Mita a ricibi informacion tocante salubridad y nutricion. E otro mita a traha cu un entrenador, cu a topa cu nan cada dos siman pa un aña largo, y despues un bes pa luna pa e dos aña siguiente.
Entrenadornan a yuda e participantenan haya manera pa aumenta nan movemento fisico. Hopi hende, incluyendo Terri Swain-Collins, a scoge pa cana 45 minuut algun bes pa siman.
“Esaki tabata algo cu mi por haci pa mi mes pa mi sinti miho,” segun Swain-Collins, 62 aña, for di Kingston, Ontario. Contacto regular cu un entrenador a mantene su motivacion y responsabilidad, el a bisa. “Mi no kier a bay y bisa, ‘Mi no a haci nada,’ pues mi semper tabata haci algo y percura pa mi cab’e.”
Despues di ocho aña, participantenan den e programa structura di ehercicio no solamente a bira mas activo compara cu e grupo di control, pero tambe tabatin 28% menos cancer y 37% menos morto di cualkier causa. Tabatin mas tensamento di musculo y otro tipo di problema similar den grupo di ehercicio.
“Ora nos a mira e resultadonan, nos tabata sorprendi,” segun co-autor di e estudio, Dr. Christopher Booth, un doctor di cancer na Kingston Health Sciences Centre na Kingston, Ontario.
Un programa di ehercicio por ser ofreci pa varios mil dollar pa cada pashent, segun Booth, “un intervencion increiblemente accesible cu ta haci hende sinti miho, reduci e chance cu nan cancer ta bolbe y yuda nan pa biba mas largo.”
Investigadornan a colecta sanger di e participantenan y lo investiga si tin relacion entre ehercicio y prevencion di cancer—via procesamento di insulina, fortalecemento di sistema inmunologico, of algo otro.
E programa cu Swain-Collins tabata den ya a caba, pero e ta sigui haci ehercicio. E ta scucha musica mientras e ta cana den un veld cerca di su cas.
Esey ta e tipo di cambio di comportamento cu hende por logra ora nan kere den e beneficio, ora nan haya manera pa hacie dibertido, y ora tin un componente social, segun co-autor di e estudio Kerry Courneya, ken ta investiga ehercicio y cancer na Universidad di Alberta. E evidencia nobo lo duna pashentnan di cancer un motibo pa keda motiva.
“Awor nos por bisa definitivamente cu ehercicio ta mehora sobrevivencia,” Courneya a bisa.
