Tur aña, 3 mei ta e fecha cu Nacionnan Uni ta celebra e principionan fundamental di libertad di prensa, ta evalua e libertad di prensa rond mundo, y ta boga pa defende e medionan di prensa contra atakenan dirigi contra nan autonomia y ta paga tributo na e periodistanan cu a perde nan bida eherciendo nan profesion.

E dia internacional aki a ser proclama pa e Asamblea General di Nacionnan Uni na 1993, siguiendo un recomendacion adopta na e di bintiseis sesion di e Conferencia General di UNESCO na 1991. Esaki na su turno tawata un siguimento riba un yamada di periodistanan Africano cu na 1991 a produci e clave ‘Windhoek Declaration on media pluralism and independence”.

E Declaracion di Windhoek ta un pronunciamento di e principionan di un prensa liber, crea dor di periodistanan di corant Africano durante e seminario di UNESCO “Promoting an Independent and Pluralistic African Press” , cual a ser teni na Windhoek, Namibia, di 29 april te cu 3 mei 1991. E documento aki ta señala e necesidad pa un prensa liber, independiente, pluralistico mundialmente, caracterizando un prensa liber como un ingrediente esencial pa democracia y alabes un derecho humano fundamental.

E Declaracion di Windhoek tawata un yamada pa cuminza un lucha pa proteha e principionan fundamental di libertad di expresion manera hancra den Articulo 19 di e Declaracion Universal di Derechonan Humano, cual ta bisa:
“Tur hende tin e derecho di libertad di expresion y opinion, cual derecho ta inclui e libertad pa mantene opinionnan sin interferencia y pa busca, ricibi y distribui informacion y idea mediante cualkier medio y sin restriccion di frontera.
2022 Tema: Periodismo bao atake digital
E tema di e aña aki pa Dia Mundial di Libertad di Prensa ta Periodismo bao Atake Digital, cu ta resalta e multiple formanan den cual periodismo, libertad di expresion y privacidad ta ser afecta pa avancenan recien den tecnologia di vigilancia, inteligencia artificial y big data mining y atakenan riba periodista a traves di medionan social y atake cibernetico, cu tur e consecuencianan cu esaki ta trece pa e confianza di publico den e canalnan di comunicacion digital.

E ultimo UNESCO World Trends Report Insights, informe pa discusion publico “Threats that Silence: Trends in the Safety of Journalists,” ta destaca con vigilancia y atakenan digital y cibernetico ta perhudica y pone na peliger periodismo.

Vigilancia (surveillance) por expone informacion compila pa periodista, incluso di denunciantenan (whistle blowers, klokkenluiders), ta viola e principio di proteccion di fuente, cual ta un rekisito universalmente reconoci como esencial pa libertad di prensa y ta hancra den Resolucionnan di Nacionnan Uni. Vigilancia tambe por perhudica e seguridad personal di periodista dor di publica of haci accesibel informacion personal sensitivo, cual por ser utilisa pa acoso y persecucion arbitrario hudicial of atakenan fisico.
Tin un creciente presion mundial pa promove y crea mas transparencia en cuanto e forma cu companianan grandi di Internet y particularmente medionan social ta explota datonan personal di usuario di Internet, con e datonan ey ta informa modelonan predictivo y inteligencia artificial, y con esaki nan por permiti amplificacion di desinformacion y odio.

Esaki a keda subraya den e Declaración di Windhoek+30, cu ta pidi empresanan tecnologico pa “traha pa garantisa e transparencia en relacion cu nan sistemanan humano y automatisa”.

Mensahe di Secretario General di Nacionnan Uni Antonio Guterres pa 2022
Riba Dia Mundial di Libertad di Prensa, nos ta destaca e trabao esencial di periodista y trahador den medionan di comunicacion cu ta busca transparencia y rendicion di cuenta di esnan den poder, hopi biaha cu riesgo grandi personal.

A lo largo di e pandemia di Covid-19, hopi trahador den medio di comunicacion tawata den prome linea, brindando informe preciso basa riba ciencia pa informa esnan encarga cu tuma decisionnan y salba bidanan. Na e mesun momento periodistanan, cubriendo cambio climatico, biodiversidad y contaminacion a logra crea atencion publico pa e tripel crisis planetario aki.

Pero e menasanan pa e libertad di periodista y trahadornan den medionan di comunicacion ta aumenta dia pa dia. Den tur tema, for di e salud global te cu e crisis climatico, corupcion y abuso di derechonan humano, periodistanan ta enfrenta cada bes mas mayor politizacion di nan trabao y intento pa silencia nan for di tur skina.
Tecnologia digital a democratisa e acceso na informacion. Pero tambe a crea retonan serio.

E modelonan comercial di hopi plataforma di medio social ta basa no ariba aumenta acceso na informacion veridico y corecto, pero mas bien riba aumenta e base y interaccion di usuario– locual frecuentemente ta nifica provoca indignacion y plama mentira
.
Trahadornan den medio di comunicacion den zona di guera no ta ser menasa pa bomba y bala so, pero tambe pa arma di falsificacion y desinformacion cu awendia ta acompaña guera moderno.
Nan por ser ataca como e enemigo, acusa di spionahe, deteni of simplemente asesina pa e mero hecho di haci nan trabao periodistico.

Tecnologia digital tambe ta facilita mas ainda censura. Hopi periodista y editor rond di mundo ta constantemente core e riesgo di haya nan programa y informenan desconecta for di Internet.
Y tecnologia digital ta crea canal nobo pa opresion y abuso. Periodista femenino ta core un riesgo particular di sufri atake y violencia online. UNESCO a descubri cu casi tres di cada cuater hende muher periodista a yega di experiencia violencia online. Hacking, atakenan cibernetico y vigilancia ilegal (tapmento) tambe ta stroba periodista di haci nan trabao.
E metodonan y herment ta cambia, pero e meta pa desacredita medionan di comunicacion y purba sconde e berdad semper ta keda mescos.
E resultadonan tambe ta mescos: personanan y sociedadnan ta incapaz pa distingui realidad di ficcion (politico) y por ser manipula den forma horibel.
Sin libertad di prensa, no tin berdadero sociedad democratico. Sin libertad di prensa, no tin libertad.

Nacionnan Uni ta traha pa apoya periodista y trahador den medio di comunicacion tur caminda. Dies aña pasa a establece un Plan di Accion riba Seguridad di Periodista, pa proteha e trahadornan di medionan di comunicacion y caba cu e impunidad de delitonan cometi contra periodista.

Riba dia Mundial di Libertad de Prensa, nos ta honra e trabao esencial di medionan di comunicacion di bisa esnan na poder nan berdad, exponiendo nan mentira y yudando crea institucionnan y sociedadnan fuerte y resiliente.
Nos ta haci un apelacion na tur gobierno, organisacion di media y compania tecnologico di mundo pa apoya e esfuersonan crucial aki.

DIA MUNDIAL DI LIBERTAD DI PRENSA, SITUACION DI ARUBA
Rainbow Warriors Core Foundation, cu hunto cu periodista na Aruba a denuncia atakenan riba libertad di prensa y periodistanan na Aruba y e intencion pa introduci un Mediaraad lo saca un rapport riba libertad di prensa y libertad di expresion for di perspectiva di Nacionnan Uni y UNESCO, Reino Hulandes y Union Europeo y tambe for di e perspectiva di Latino America y Caribe.

E rapport aki lo ser publica na fin di Mei y duna amplio y detaya informacion basa riba documentacion di investigacion academico y datonan veridico, entre otro riba framework legal y en particular riba checks and balances, salvaguardia pa funcionamento di prensa liber, autoregulacionan di medionan di prensa y tambe e cuchiu di dobel fila cu yama mediaraad (press and media councils).

 

 

LEAVE A REPLY

Please enter your comment!
Please enter your name here