Ekipo di Taekwondo di Aruba lo competi den e edicion shete di e TK5 na Corsow

Diabierna atardi un delegacion den e deporte di taekwondo a biaha pa Corsow, unda nan lo competi den e di shete edicion di e asina yama TK5 na nos isla ruman. Aruba lo competi cu un ekipo hubenil entrena pa e conocido atleta Olimpico Monica Pimentel cu ta ser asisti pa e hoben Jourde Klaber.  Ambos lo guia e hobennan durante di nan respectivo combatenan na Corsow.  Mester bisa cu e atletanan di Aruba a prepara nan mes debidamente pa e competencia di TK5 unda ta premira cu Aruba lo bini cu algun trofeo bek cas.

Den un combersacion cu Monica Pimentel e la conta nos cu e ekipo di Aruba ta bay bon prepara. E TK 5 ta un combate di 5 contra 5, mas largo e accion mas hopi e adrenalina. E ta algo hopi bon pa mira y ta diferente di un combate 1 contra 1. Den e team di Aruba tin dos atleta cu hopi experencia y varios competencia internacional riba nan nomber. Mas cu claro e otro atletanan cu ta complementa e ekipo tin hopi cualidad, cada uno tin esaki, esey ta hasi tambe cu sigur nan lo por duna un bon papel na Corsow. Pa Monica mes esaki ta un oportunidad unico pa guia e atletanan, algo cu den futuro e lo wak su mes ta hasi como un coach den e deprote di taekwondo. E ta contento di por a haya e oportunidad di intercambia su experencia commo un atleta Olimpico na e hobennan aki.

E ekipo hubenil cu ta consisti di 5 atleta cu hopi talento y cu lo representa Aruba na Corsow ta e atletanan Rasheed Lowe, Hakeem Lowe, Záhyon Klabér, Rouel Baarh y Nathan Fradl. Lotto di nan banda ta masha contento di aporta un bes mas na e organsacion di Stichting Brazil Taekwondo cu semper ta traha duro na bienestar di tur su atletanan. E organisacion deportivo ta masha activo durante anja unda riba un base regular nan ta organisa nan actividadnan manera carwash, benta di calendar, ect pa asina recauda fondo pa nan club. Tur e fondonan aki ta bay bek den nan atletanan.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di Taekwondo pa e 7 edicion di e TK5 na Corsow.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.