Mañan Republica Dominicana lo celebra un eleccion general, despues cu Junta Central Electoral (JCE) a dicidi, na luna di mei ultimo, pa pospone e eleccion aki pa dos luna pa salvaguardia salud di nan poblacion debi na e pandemia di Covid. E biaha aki nan ta bay eligi presidente, vice-presidente y diputadonan.

Na Aruba, presidente di fundacion Dominicana Arubanse Juan Pablo Duarte, Winston Tavarez a bisa cu ainda Republica Dominicana tin cantidad di caso di Covid debi na e pandemia. Pero e pais Caribeño aki su ley electoral ta cita cu mester haci eleccion cada 4 aña. Esey ta para den nan constitucion tambe. El a declara na Bon Dia Aruba cu actualmente 2138 Dominicano cu por vota mañan na Aruba.

P’esey el a informa cu mañan 5 di juli e eleccion aki lo tuma luga na Centro di Bario Playa Pabao for di 7or di mainta pa 5or atardi. E fundacion aki como parti importante di e sociedad civil Dominicano na Aruba ta invita tur Dominicano residente na Aruba pa eherce e derecho aki. Nan mester tin nan cedula electoral, y tambe nan mester aparece registra den e ‘padron’ of censo electoral pa nan por haci uzo di e derecho sagrado aki.

Tavarez a declara cu den pasado JCE a emiti un resolucion pa e personanan cu no tabata den e censo electoral pa tog nan por haci uzo di nan derecho di voto. Pero e biaha aki te ainda JCE no a bin cu niun resolucion asina.

Ta hopi importante pa Dominicano cu ta bay vota mester verifica prome si nan ta aparece den e censo (padron) electoral di JCE. Ya cu si bo no ta aparece registra, y no tin niun resolucion di JCE, bo no por vota. Como medida preventivo contra Covid, nan ta pidi pa tur hende bay bisti cu mask. Ademas tur hende mester tene cuenta riba uzo di hand sanitizer y mantene distaciamento social. Tambe ora cu bo a caba di vota, bo mester bandona e sitio pa evita aglomeracion di persona. Bo mester bay cas unda bo por sigui e resultado dor di social media.

Con pa eherce bo voto

El a splica cu tin dos mesa of puesto di votacion. Unabes cu bo ta yega na e mesa di votacion bo ta presenta bo cedula pa verifica cu bo ta registra den e censo electoral. E votado ta bay haya dos tarheta electoral pa vota. Un cu ta skirbi presidencial y otro diputado di ultramar. Check si e tarheta di votacion tin e firma y stapel di e presidente di e mesa di votacion. Sin dje e voto no ta valido y ta wordo considera nulo na momento di e conteo.

Na momento di bo eleccion, bo ta marca un X riba un candidato so di bo preferencia, y despues bo ta deposita e voto den e urna electoral.

Tavarez a laga sa cu si den caso bo a perde bo cedula, ainda bo por saca un duplicado di dje na Consulado Dominicano, pero e tin un costo cune. El a sugeri cu semper ta importante pa sigui e regla di e autoridadnan electoral cu ta den e sitio di votacion. Pa esun cu tin algun pregunta relaciona cu e eleccion aki nan por yama libremente na e celnan 592-1679/566-8740/594-5115, caminda nan por haya mas informacion.

El ta recorda tur hende cu nos ta bibando den un situacion excepcional debi na Covid. Actualmente tin tres caso positivo y activo di Covid na Aruba.

 

 

 

LEAVE A REPLY

Please enter your comment!
Please enter your name here