Mediante un comunicado pa prensa, ELMAR ta avisa cu esaki ta e ultimo weekend di Carnaval, na unda nan ta emiti un aviso importante na e comunidad, particularmente esnan cu tin un kavel den e area di Vondellaan riba ruta di carnaval.
E area di Vondellaan, manera hopi parti di Aruba, ta crusa cu infrastructura electrico bou di tera, incluyendo kabelnan di 60 KV di voltahe halto pa sigura distribucion confiabel di coriente pa casnan y negoshinan rond di Aruba. ELMAR a ricibi informe cu tin personanan cu ta usando piknan pa hinca bou tera, lubidando cu nan ta coriendo potencial peliger electrico.
Intentando di hinca piknan den tera sin e mapa di e kabelnan ta pone riesgonan significante no solamente pa e individuo cu ta ehecuta e accion, pero tambe pa comunidad en general. Pa salvaguardia contra e peligernan aki, ELMAR ta conseha doñonan di kavelnan pa no usa pik pa hancra y en bes di esaki, nos ta recomenda utilisa solucionnan alternativo manera saconan di santo, peso, of piedra, cu no ta envolvi boramento den tera.
Potret aki no ta di Vondellaan, pero ta pa ilustra e kabel subteraneo
