Den un comunicado prensa, gerencia di ELMAR a informa comunidad cu entrante 1 di mei 2023, e prijs di coriente ta baha cu 7.1% y cu e reduccion aki a bira posibel debi cu e tarifa di compra di energia cu ELMAR ta paga na WEB a baha.
Na 2022, nan a anuncia un aumento di prijs di coriente debi na factornan internacional fuera di nan control cu a influencia e costo di generacion di energia substancialmente. Sinembargo, awor cu nan a logra negocia un miho tarifa di compra di energia for di WEB, esaki a crea e espacio suficiente cu ta permiti ELMAR baha e prijs di coriente pa consumidornan. ELMAR ta cumpra e energia cu WEB ta genera pa asina ELMAR por transmiti y distribui e coriente den tur bario di Aruba.
ELMAR tin comprension pa e impacto cu e aumento di prijs por tin riba presupuesto di cada persona of famia y segun nan ta afirma, nan ta spera cu e reduccion aki lo duna algun alivio. Nan ta pidi na comunidad pa tuma nota di e tabel cu ta indica e prijs nobo di coriente.
Igualmente nan a enfatisa pa recorda na nan clientenan pa ta consciente di nan consumo di coriente y unda ta posibel, pa tuma pasonan pa reduci nan uso. Accionnan chikito manera revisa cas pa saca plug of paga aparatonan cu no mester ta cendi por haci un diferencia den reduccion di factura di coriente.
E reduccion di prijs den tarifa di coriente ta un topico cu tabata den boca di pueblo pa algun dia despues cu instancianan a informa cu e aumento tabata pa 6 luna solamente; pero tempo a pasa y comunidad no a scucha nada mas, loke a bira un discusion entre e ministernan encarga cu Economia y cu Energia.
Minister Geoffrey Wever dia 30 di maart a declara cu nan a ricibi un carta di ELMAR unda ta duna un propuesta pa rebaha di tarifa di coriente y tambe nan a haya un splicacion di dje.
Den un comunicado pa prensa di dia 29 di maart, minister Wever hunto cu minister di Energia, Glenbert Croes a splica cu den luna di juli di aña pasa, WEB y ELMAR a informa Gobierno di Aruba cu como consecuencia di e aumento di prijs di petroleo riba mercado internacional, mester aumenta e prijs di awa y coriente mester.
Segun Gobierno di Aruba a sigura, nan verifica tur calculo y cifra financiero y a duna un aprobacion di 6 luna pa aumenta e prijs di coriente, bao di condicion cu dia 1 februari 2023 mester reevalua esaki. Pues e aumento ta valido te cu 1 februari 2023. E aumento aki tabata necesario pa garantisa e suministro di awa y coriente na Aruba.
“Mirando cu no tin un aprobacion di Gobierno di Aruba pa un ahuste di e prijs di coriente pa e periodo despues di 1 februari 2023, e facturanan cu ELMAR a emiti over e luna di februari 2023 ta den violacion di e concessievoorwaarden y nos a informa ELMAR na varios ocasion di esaki a traves di varios carta cu mi a manda ELMAR den nomber di mi mes como e minister encarga cu tarifa segun e concesion y tambe den nomber di colega minister Glenbert Croes cu ta encarga cu energia di Aruba”, segun minister Wever.
