(Infobae) – Musk ta reconoce cu contrata solamente basa riba reputacion of experiencia anterior no ta garantisa exito den su companianan.

Den industria tecnologico, caminda competencia pa talento ta fuerte, Elon Musk ta argumenta cu proceso di reclutamento ta bay hopi mas leu cu revisa un curriculum impresionante. E CEO, conoci pa su estilo di liderato meticuloso — cu e mes ironicamente ta yama “nanomaneho” — ta bisa cu e clave ta den interaccion directo y den buskeda di “evidencia di capacidad excepcional”.

Durante un combersacion cu cofundador di Stripe John Collison y podcaster Dwarkesh Patel, Musk a comparti su criterionan ora di contrata. “Generalmente, loke mi ta bisa hende — y mi mes, como aspiracion — ta: no wak e curriculum. Confia den bo interaccion. E curriculum por parce impresionante, pero si despues di 20 minuut di combersacion no tin ningun ‘wow’, bo mester confia den e combersacion, no den e papel,” el a splica.

“Puiro magico” y e guera pa talento den Silicon Valley

Musk a recorda con companianan manera Apple tabata “bombardia” lidernan y ingenieronan di Tesla cu ofertanan iresistible. Na 2018, Apple a yega di contrata 46 ex-empleado di Tesla pa su proyecto di auto electrico, cu awor a ser cancela, y pa otro posicionnan, segun CNBC. E ofertanan tabata dobel salario di Tesla y, como nan tabata situa na Silicon Valley, e tabata hacie facil pa cambia compania sin cambia estilo di bida di e empleadonan.

Musk mes ta reconoce cu un tempo el a cay den e tentacion di contrata basa riba reputacion. “Mi tambe tabata victima di e ‘puiro magico’, pensando cu un hende for di Google of Apple lo ta un exito inmediato,” el a admiti. Pero pronto el a descubri cu un historia di trabao y credencialnan fuerte no ta garantisa rendemento.

Aunke e ta balora talento, inteligencia y etica di trabao, Musk a siña pone importancia special riba bondad y confiansa. “Mi ta kere cu bondad di curason ta importante. Den pasado mi no a duna esaki suficiente peso. Pues, nan ta bon hende? Nan ta confiable? Nan ta inteligente, talentoso y trahador?” el a reflexiona.