(AP) – Riba dak di klas di Ingles na scol secundario di Abbie Brockman, e luznan ta cubri cu imagennan di un shelo blauw briyante, cu algun nubia ta flota.
Pafo, e shelo real no semper ta blauw. Hopi biaha esaki ta yen di contaminacion cu plantanan di energia den e parti aki di Indiana. Sabiendo exactamente con hopi y kico e por ta haciendo na e hendenan cu ta biba aki, ta dicon Brockman a involucra cu organisacionnan ambiental local cu ta instalando monitor pa awa y aire den su comunidad.
“Gobierno y e industria ta hopi, hopi, hopi poderoso. E ta hopi mas poderoso cu ami. Mi ta djis un docente di Ingles,” Brockman a bisa. Pero e kier sinti cu e por haci un diferencia.
Di un manera, Brockman su monitor ta reproduci e reportahe cu Environmental Protection Agency a cuminsa rekeri for di contaminadornan grandi mas di un decada atras. Emision for di 4 planta di carbon na Indiana a cay cu 60% desde 2010, ora cu e regla a drenta den efecto.
E regla aki awo ta den peligro, un di varios cu President Donald Trump su EPA ta argumenta ta costoso y un peso pa e industria.
Sinembargo expertonan ta bisa cu kita e rekisito ta pone den riesgo un aumento grandi den emision di companianan no ta publicamente responsable pa kico nan ta pone den aire. Y nan ta bisa cu perde e data – na mesun tempo e EPA ta cortando e calidad di aire otro caminda – lo haci mas dificil pa lucha contra cambio di clima.
Den medio di tur esaki tin e programa di Greenhouse Gas Reporting, un regla di 2009 for di Presidente Barack Obama su administracion cu ta afecta e contaminadornan grandi di carbon manera refinerianan, plantanan di energia y dump. Den e añanan desde esaki, nan a reporta colectivamente un disminucion di 20% den emisionnan, mas tanto motiva pa e clausura di plantanan di carbon.
Y kico ta sucede na e contaminadornan ta haci un diferencia. Nan emision den disminucion ta responsable pa un disminucion modesto den tur emision di gas berde na Merca desde 2010.
E registro aki ta inclui sitionan cu usualmente no ta considera un contaminador grandi pero cu tin emision di gas notable, manera campus di college y fabricanan di cornflakes por ehempel. Te hasta Walt Disney World na Florida, unda contaminacion a disminui cu 62% desde 2010, mester a duna nan rapport conhuntamente cu casi 10,600 otro luga.
“Nos no por resolve cambio di clima sin sa con hopi contaminacion e fabricanan grandi ta emiti y con esaki ta cambiando durante tempo,” Jeremy Symons, un ex consehero di clima di EPA cu awo ta na Environmental Protection Network, un organisacion di ex oficialnan di EPA cu ta monitor politicanan ambiental. E grupo a provee calculacionnan como parti di The Associated Press su analisis di impactonan for di e proposicion.
Symons a bisa cu algun compania lo duna bon bini na e registro pa motibo cu esaki lo haci contaminacion mas facil.
Te ainda no ta cla con hopi e registro mes a contribui na e disminucion di emision. Mas regulacion specifico por lo menos pa provee un base pa loke nan a haci,” Stanford University su cientifico di clima Rob Jackson, ken ta hefe di Global Carbon Project a bisa, cual ta un grupo di cientificonan cu ta haci un conteo anual di emision di carbon.
Gina McCarthy, un ex administrador di EPA bao di Obama, a bisa cu e registro ta laga cla con e plantanan di energia ta trahando en comparacion cu otro, y esaki ta induci na un emision mas abao. “E ta nifica placa pa e companianan aki. Su gasto. Su reputacion. E ta, mi ta kere, un storia di exito grandioso y mi ta spera e continua.”
E posible fin di e rekisito aki ta bini mientras expertonan ta bisa cu hopi di e pais su aire no ta monitoria. Nelson Arrley Roque, un profesor di Penn State cu ta co-autor di un estudio den april tocante e “desiertonan di monitoreo,” a bisa cu cerca di 40% di e tereno Mericano ta sin monitor. Esaki hopi biaha ta inclui barionan di menos recurso y otro barionan.
“E aire ta importante pa nos tur, pero aparentemente 50 miyon persona no por conoce y nunca no sa” con malo e aire ta, segun Roque.
EPA tambe ta purbando di trece back placa cu tabata stipula pa monitor aire, parti di e terminacion di e subsidionan cu e tabatin pa tuma accion pa diversidad, igualdad y inclusion. Esaki ta inclui 500,000 cu lo a financia 40 monitor di aire den un comunidad di minoria cu tin ingreso abao na Charlotte, North Carolina.
CleaneAIRE NC, un organisacion cu ta traha pa mehora e calidad di aire na e estado cu a ricibi e subsidio ta demandando. “E no ta diversidad, igualdad y inclusion. E ta derechonan humano,” Dasha Wall a bisa, e grupo su manager di programa di ciencia. “Nos tur merece un derecho pa tin aire limpi.”
Investigacion ta fuertemente conecta mal calidad di aire na malesanan manera asthma y malesa di curason, cu un conexion menos estableci na cancer. Cerca di industrianan di polucion, expertonan ta bisa loke hopi biaha ta falta ta of suficiente data den localidad specifico of e disposicion di investiga e impacto riba salud.
Indiana ta bisa cu e ta mantene un “monitoreo robusto den henter e estado y un programa di evaluacion pa aire, tera y awa,” pero Brockman y otronan den e parti di estado aki, incluyendo miembronan di Southwestern Indiana Citizens for Quality of Life, no ta satisfecho. Nan ta instalando nan propio monitor pa calidad di aire y awa. E ta un trabao di tempo completo pa mantene e red di monitor y lucha contra problemanan di conectividad.
