Bendedoranan di droga na Mexico a haya un manera hopi creativo, pa asina cumpli cu nan tarea di benta di droga den zona turistico y bohemio di Mexico. Nan tabata disfrasa como partidor di cuminda di servicio di Uber Eats.
Uber Eats ta un aplicacion cu ta duna e usuario e facilidad pa pidi cuminda desde cualkier lugar di ciudad di Mexico via nan telefon. E hende cu ta traha como partidor di cuminda ta recore henter ciudad riba un bicicleta y cu un tas grandi, den cual nan ta warda cuminda.
E partidor a tuma oportunidad di e aplicacion creativo di traha un tas falso y recore ciudad riba bicicleta partiendo droga cu tabata sali for di e bario Tepito. E obhetivo tabata distribui na lugarnan turistico manera Zona Rosa y colonia Condesa di Mexico, pasobra ta lugarnan famoso pa un presencia grandi di stranhero.
Autoridad di ciudad di Mexico a haya sa di e modus operandi despues cu a detene e grupo di partidor falso di Uber Eats na un lugar cu tabata warda 300 kilo di marihuana y varios disfraz.Den e lugar manera un deposito tabatin un rafaga di tiro, caminda a yega mas di 200 polis despues cu esnan cu tabata den e lugar a purba huy. Polis a drenta via un caminda cerca cu tabata conecta cu e deposito, unda como 10 persona tabata cuida e carga di droga, entre nan dos mucha menor di edad. Tur hende a keda deteni.
Te awor Uber no a duna ningun comunicado ni posicion tocante e topico aki. Sin embargo e famoso back pack di e partidor di cuminda ta disponibel riba internet na un prijs di 500 peso Mexicano (USD 27).
