(CuraçaoChronicle) – Joran van der Sloot ta luchando contra su extradicion di Peru pa Merca, segun su abogado Peruano, Maximo Altez a anuncia. Segun e abogado, Van der Sloot a dicidi di apela despues di un bishita di empleadonan di e embahada Hulandes, NOS a reporta.
E homber Hulandes di 35 aña actualmente ta cumpliendo cu un sentencia di 28 aña na Peru pa e asesinato di e studiante Peruano di 21 aña, Stephany Flores na aña 2010 y otro sentencia di 18 aña pa trafico di droga. Na Merca, e ta busca y acusa di extorsiona e famia di Natalee Holloway, ken ta un hoben Mericano cu a desaparece na Aruba den aña 2005 despues cu a mira su persona cu Van der Sloot.
Luna pasa, Peru a anuncia cu nan lo temporalmente extradita Van der Sloot pa e para huicio den e caso di extorsion. E extradicion tabata di tuma luga diahuebs. Prome cu esaki e autoridadnan Peruano a move Van der Sloot na un prizon na Lima siman ultimo.
Segun Altez, Van der Sloot inicialmente no tabatin intencion di impedi e extradicion pa motibo cu e kier a proba su inocencia na Merca. El a cambia di opinion despues cu empleadonan di embahada Hulandes a bishita su persona y a convence Van der Sloot apela e extradicion, segun loke e abogado a conta.
Ministerio Hulandes di Asuntonan den Exterior no a confirma e embahada su rol ni su bishita na Van der Sloot. E Ministerio no ta duna comentario tocante casonan individual, segun vocero a conta De Telegraaf. “Hulanda no por interferi den e proceso legal di otro pais,” e vocero a declara. “Nos ta provee asistencia regular, incluyendo bishita, na tur ciudadano Hulandes cu ta den detencion den exterior y ta desea di ricibi esaki.”
