(NLTimes) – Un mayoria di ciudadano Hulandes ta sinti nan mes frustra y impotente tocante e politica di e pais, segun un encuesta nobo di Oficina di Planificacion Social y Cultural (Sociaal en Cultureel Planbureau, SCP). Cincuenta y nuebe porciento di esnan cu a participa de e encuesta ta kere cu e pais ta bay den e direccion robes y ta bisa cu politiconan no ta logra ofrece solucionnan.
A haci e encuesta despues cu gobierno a cay na juni, ora cu PVV a bandona e coalicion, y despues cu ministernan di Nieuw Sociaal Contract (NSC) a tuma nan retiro na fin di augustus. E encuesta a haya cu 60% di e encuestadonan ta duna Den Haag politico un puntuacion di onvoldoende.
Critica ta enfoca riba percepcion di bringamento interno y stagnacion. Un encuestado a duna gobierno un 1, bisando, “Un cantidad di burache. No ta tuma responsabilidad.” Un otro a bisa, “Mi ta haya cu e ta un desorden aworaki, specialmente ya cu NSC tambe a baha.”
Investigadornan di SCP ta señala cu e confiansa politico tabata abou for di 2021, cu hopi ciudadano ta kere cu asuntonan urgente, manera e scarsedad di vivienda, ta keda sin ser resolvi. Confiansa tambe tabata abou binti aña pasa.
Josje den Ridder, un investigador di SCP, a bisa, “Hende ta sinti cu nan por haci poco tocante e efectonan negativo di desaroyonan domestico y den exterior. Den nan bista, gobierno por a atende e problemanan aki pero sea no ta haci’e of ta actua incorecto. E resultado ta cu tin hende ta hala atras y stop di vota.”
E encuesta tambe a subraya preocupacionnan tocante polarisacion social relaciona cu asuntonan di inmigracion y clima. “Hende ta kere cu e asuntonan aki ta causa division y comportacion grosero pa cu otro,” Den Ridder a bisa. “Algun ta haya esaki asina desagradabel cu nan ta evita combersacionnan cu hende cu ta pensa diferente. Esaki ta un riesgo pa democracia.”
