Fundacion Parke Nacional Aruba hunto cu stagiaire Els Hesse y Jean-Paul Moquette di Van Hall Larenstein University of Applied Sciences di Hulanda ta haciendo sondeo riba e cantidad y salud di yerbe di lama den Parke Marino Aruba.

FPNA a informa cu banda di esey, ta sondea riba aspectonan biofisico, esaki tambe ta conduciendo un encuesta cu ta “pa identifica e nivel di conocemento y e percepcion cu tin riba e importancia di yerbe di lama”. FPNA ta extende un invitacion pa personana participa den encuesta aki cu ta parti di nan investigacion, e resultadonan lo yuda cu futuro strategianan di investigacion y conservacion di e yerbe di lama.

Ecosistema marino ta un di ecosistema mas importante rond di mundo, pa motibo cu nan ta suministra cuminda y refugio pa hopi organismo como turtuga, cabaron, entre otronan, tambe ta importante pasobra ta utilisa dioxido di carbono pa realisa fotosintesis y crea oxigeno den proceso aki, cu ser humano y otro bestianan despues ta usa pa hala rosea.

Tambe nan ta yuda protege e costa di Aruba contra erosion mediante e uso di e rijs pa stabilisa y fortalece e sedimentonan. Ora tin un luga cu yerbe di lama, esey tambe ta detene e olanan di lama, loke tambe ta yuda reduci erosion na e costa y ta ofrece proteccion di tormentanan.

Yerbe di lama tambe ta hunga un rol importante den e salud general di oceannan, e areanan cu yerbe di lama ta filtra e awa pa sigura cu e awa limpi ta yega te ecosistema bisiña, como rif di coral.

Yerbe di lama a bin disparce debi na aumento di actividadnan humano, casi 30% di e cobertura di nan conoci a disparce for di siglo 19, ta p’esey cu ta importante e conservacion di ecosistema aki pa evita cu lo wordo deteriora mas.

Por coopera cu esaki, ora ta bay lama percura pa no trapa e yerbe di lama, no contamina of tira sushi, no tira anker di botonan riba yerbe di lama, no usa motornan di boto den awanan poco profundo y no pisca den areanan cu tin yerbe di lama.

Pa participa den encuesta aki por subi riba e Facebook page di Aruna National Park Foundation na unda e ta disponibel den 4 idioma.