Ayera mainta entrada hudicial a tuma lugar na varios adres, entre nan na cas di ex-minister Otmar Oduber na Pavia, cu recientemente tabata escenario di un candela.

Tambe e team aki, entre nan personal di RST (Recherche Samenwerkings Team, a haci un entrada hudicial na un establecimento di delivery service situa na Rumbastraat, den e mesun vecindario di Ministerio Publico (OM).

E entradanan aki ta den cuadro di un investigacion penal. Durante e entradanan hudicial aki nan a confisca documento y cargadornan di dato. Te ainda no a informa oficialmente di ningun detencion.

Diferente reaccion e noticia aki a produci, mirando cu ultimamente a yega varios denuncia contra e ex-politico aki na Ministerio Publico (OM). Aunke OM a informa cu e investigacion aki cu ta carga e nomber Flamingo, ta data caba di aña pasa september.

OM a emiti un comunicado di prensa caminda e instituto aki a informa cu Landsrecherche a haci varios investigacion den cooperacion cu RST y Cuerpo Policial Aruba bao guia di Hues Comisario. E entradanan hudicial aki ta den cuadro di un investigacion penal di Landsrecherche tocante e posibel delito di corupcion y otro hecho castigabel relaciona cu otorgamento di tereno di gobierno.

Procurador General a duna Landsrecherche orden na september 2019 pa cuminsa e investigacion aki a base di informacion cu OM a ricibi for di KPA. Den e investigacion aki a solicita pa OM envolve varios persona y organisacion. E investigacion bao e codigo “Flamingo” ta dirigi primordialmente pa investiga posibel iregularidad den otorgamento di tereno comercial di erfpacht den e periodo di 2017 pa 2019.

E investigacion aki ta dirigi pa determina si un of mas compania a logra obtene incorectamente un optie riba tereno erfpacht durante e periodo specifico di november 2017 y december 2019,cu ta e periodo den cual e mandatario a funciona den e posicion ey, caminda ta investiga e eventual rol di e minister anterior di e cartera encarga cu otorgamento di tereno erfpacht.

E team investigativo lo bay analisa e contenido di e documentacion y e computernan cu a confisca. Tambe nan lo bay scucha sospechoso y testigonan. E investigacion aki ta den su fase inicial, segun OM, y por lo tanto no por bisa ainda si despues lo sigui cu detencion di un of mas sospechoso. Tur cos ta depende di resultado di e investigacion.

Ministerio Publico no kier a duna mas informacion na e momento aki tocante e identidad di e sospechosonan y/o di e sospechonan contra nan.