Den un nota hopi positivo, nos a observa cu ambos Gobernador Su Excelencia Sr. Alfonso Boekhoudt, y Minister-President Mike Eman a pone extra enfasis riba e compartimento di prosperidad riba nos isla, den combinacion cu enfasis riba innovacion. Nos tin cu bisa cu esaki por ta un stap hopi positivo si en berdad accion bin mara na e palabranan bunita.
Den e contexto aki, e concepto di Universal Basic Income, Renteloze Leningen/Subsidies pa cosnan cu ta beneficia nos pais en general, combina cu Sin Tax riba comportamento cu mester wordo mitiga, por forma un fundeshi pa un sociedad hopi bunita, cual mi ta kere 99% di ciudadano lo desea riba largo plaso.
Entrada Universal
Esaki no ta un concepto nobo historicamente, pero hopi e ta parce riba prome bista algo un poco “radical”. E idea di duna ciudadano placa sin ningun tegencompensatie na otro banda, pa hopi ta un concepto cu intelectualmente ta crea un poco incomodidad. Pero como herment pa reduci pobresa den termino absoluto y relativo, pa reduci markers negativo den sociedad como criminalidad y adicion, en fin pa promove un sociedad hopi mas positivo, duradero y resiliente. E ta un herment simpel pero hopi potente. Simpel den forma cu tur ciudadano adulto riba 18 aña ta haya e mesun suma, sin importa ki status, trabao, educacion etc. nan por tin. Tur ta comparti den e pobresa sin ningun discriminacion. Na otro banda e ta hopi mas simpel cu tur sorto di ley, landsverordeningen y toeslagen etc.. Simpel pero hopi efectivo.
Prestamo sin interes pa beneficio di sociedad
Awo imagina cada Arubiano haya ban bisa 500 florin extra pa luna. Optimalmente nos kier pa e suma aki ser inverti den cosnan positivo y cu ta beneficia henter nos sociedad riba plaso largo. Hopi di esaki nos a nota varios bes caba den publicacionnan den pasado, pero pensa haci cas energie-zuinig, panel solar, bateria na cas, auto electrico, educacion y cursonan profesional, un spaarfonds pa pensioen of pa yega na un propio cas. Mayoria lector por ta di acuerdo cu esaki ta e gastonan cu eigenlijk nos lo kier wak mas como un sociedad na Aruba.
Den e contexto aki Gobierno tin hopi diferente type di herment, pero mi ta di opinion cu e prestamo sin interes, mescos cu un Arubalening pa estudio universitario ta un herment sumamente atractivo. Dus por ehempel un famia di menos recurso kier inverti den un di e categorianan di inversion menciona den e alinea anterior, pero no tin e capital pa esaki. Wel e ora Gobierno lo ofrece un prestamo sin interes si cumpli cu rekisitonan cu e fondonan ta bay den e direccion positivo manera nos lo kier como sociedad.
Vice & Sin Tax
Profundamente den nos curason, mayoria hende tambe sa kico ta gastonan cu NO ta positivo pa nan y tambe pa sociedad en general. Esakinan mester ser minimalisa den tur manera posibel, como cu un Gobierno mester protege su ciudadanonan contra esaki. Tambe si bin extra entrada via un Entrada Universal, nos no kier pa esaki bay tira afo na vicio. Como sociedad tambe nos mester duna un manera pa sali y ayudo pa tur esnan cu ta den e grip di cualkier vicio, y ofrece ayudo sin discriminacion y waardeoordeel.
Un sociedad mas bunita pa Aruba
Mi ta kere cu un sociedad unda pobresa y desesperacion humano ta minimo, unda inversionnan positivo individual y riba nivel di un comunidad ser maximalisa. Por yuda crea un sociedad unda e mayoria grandi lo desea di biba. Awo cu parce cu politicamente nos ultra-kader a yega e momento cu nan ta consciente di esaki, nos mester usa e momento hopi positivo aki di autoconciencia pa en berdad pone accion tras di e palabranan bunita cu nos a tende e siman cu a pasa.
