Durante un conferencia di prensa recien Minister di Husticia, Integracion y Transporte Publico, Arthur Dowers (AVP), a informa cu Departamento di Brandweer lo conoce un comandante nobo entrante 1 di januari 2026.
Minister Dowers a splica cu den ultimo añanan Departamento di Brandweer di pais Aruba a pasa den basta turbulencia y na e momento aki gobierno ta purbando di yega na un funcionamento regular atrobe di Departamento di Brandweer. Den e proceso aki a logra di atrae un comandante nobo pa Brandweer.
No ta un secreto cu basta aña Departamento di Brandweer no tin un comandante di Brandweer despues cu a schors e comandante cu tabat’ey. Esaki, el a señala, a pone cu e funcionamento di e organisacion no tabata optimal
Den transucrso di añanan a bin cu personanan di afo cu cierto experticio, pero el a indica, cu e personanan aki no necesariamente tabata den posicion pa eherce e rol di comandante y asina dirigi e organisacion manera cu mester.
Minister Dowers a splica cu Gobierno di Aruba a papia cu Sr. Jair Tromp, un persona conoci den comunidad y un ciudadano di Aruba cu den pasado ya a traha na Departamento di Brandweer. Tromp a bay traha na Boneiro pa islanan BES na un dado momento y ultimo e tabata traha na Corsou.
Gobierno tabata den combersacion cune algun siman caba y a yega na un acuerdo cu e lo asumi e responsabilidad di comandante di Departamento di Brandweer na Aruba entrante 1 di januari 2026.
