Despues di un sesion di pregunta den Parlamento di Aruba, caminda minister di Husticia, Sr. Arthur Dowers (AVP) a comparti informacion tocante e proyecto di bodycam pa Cuerpo Policial di Aruba, parlamentario di fraccion MEP, Rocco Tjon, a tene un conferencia di prensa pa duna un splicacion elabora tocante e proyecto piloto, cu lo inicia den luna di juli.

Durante e conferencia di prensa parlamentario Tjon a splica cu ora cu a bin cu e proyecto di bodycams, e meta principal tabata pa sigura e seguridad di e agente policial y a dicidi pa introduci esaki a traves di un proyecto piloto. El a sigui splica cu despues nan a hiba diferente combersacion cu sindicato di polis, y consecuentemente e intencion tabata pa e proyecto piloto mustra kico ta e balor agrega di e bodycams aki y a base di esaki tuma un decision si ta scoge pa implementa e bodycams den full Cuerpo Policial.

Tjon a indica cu tin 32 bodycam cumpra, cu ta locual e mes acorda tempo e tabata minister di Husticia. El a remarca cu loke a percura cu a tuma mas tempo pa cuminsa cu e proyecto piloto ta debi na dos aspecto pa loke ta trata legislacion

El a enfatisa cu e proyecto no ta consisti di simplemente cu e polis ta bisti e bodycam y e ta cuminsa cana cune, pero tin diferente rekisito cu KPA den e caso aki lo mester cumpli cune. Pa loke ta trata e imagen, mester defini ki ora por usa nan ki ora no, con ta warda e imagennan aki y hopi importante tambe con ta distribui e imagennan aki, y con ta deshaci di e imagennan aki.

“Esaki ta aspectonan cu ainda tabata den preparacion y mi a compronde en todo caso cu otro luna juli e proyecto aki ta inicia tambe,” e parlamentario a subraya.

Pa loke ta trata e uso di e bodycams, parlamentario Tjon a splica cu e agentenan policial por usa e bodycam tur caminda, pero loke ta importante ta cu e agente policial mester anuncia y pueblo mester sa cu e polis tin un bodycam bisti y mester sa cu e ta cendi tambe.

Na mesun momento Tjon a remarca cu e bodycam no ta solucion pa tur problema di mundo. El a enfatisa cu e bodycam t’ey pa dos motibo principal: aumenta e seguridad pa e agente policial y percura tambe pa ora algo sucede tin material di biaha cu por mustra si loke un persona involucra den un incidente cu e polis ta bisa ta berdad, of si loke e polis ta bisa ta berdad. Esaki, el a indica, ta tambe loke tur investigacion riba e parti ey ta mustra y ta loke ta e balor agrega di henter e proyecto di bodycams.

“Esey ta e motibo eigenlijk cu a bin cu bodycams, no pa mas castigo, no pa evita incidentenan, absolutamente cu no,” el a subraya.

E parlamentario a menciona cu loke a bin a sali na cla den investigacionnan na por ehempel Merca den e caso aki ta cu kehonan entrega contra polis a baha drasticamente pasobra tabatin un tendencia cu hopi keho falso tabata ser entrega, pero una bes cu un ciudadano sa cu e polis tin bodycam bisti, esey no ta sucede mas.

Pa loke ta trata e proyecto di camara di seguridad rond di e isla, parlamentario Tjon a splica cu tur cos cu a ser aproba ta consisti di diferente fase. El a menciona cu tin por ehempel e parti di area di hotel cu ya tabata full ehecuta y tabatin e area di San Nicolas.

El a sigui splica cu tin 40 punto strategico rond di Aruba, cual tabata e proyecto cu a bay via ELMAR y Setar tabata encarga cu ehecucion di e area di hotel y aworaki ta trahando riba e proyecto na Oranjestad cu ta uno cu e gabinete anterior a bay laga atras aproba caba.

Pa loke ta e legislacion pa e proyecto aki, el a splica cu den su concepto e ley ta completamente den orden pa por haci uso di camara. El a indica cu tin borchinan cu ta anuncia cu ta drenta den un area caminda tin vigilancia di camara. Y pa loke ta trata bodycams, el a menciona cu el a scucha minister di Husticia Arthur Dowers duna un declaracion di esaki y indica cu den su concepto tambe e ley ta acapara esaki.

Ayera mainta mediante un comunicado di prensa Cuerpo Policial Aruba (KPA) a anuncia cu e proyecto di bodycams en berdad ta cla pa inicia dia 1 di juli. “Nos ta scucha nos comunidad y hunto cu avancenan tecnologico nos organisacion ta den pleno desaroyo pa ehecuta proyecto nan nobo cu ta encera cambionan grandi tanto pa nos di Cuerpo Policial Aruba y nos comunidad,” KPA a indica.

Segun e organisacion bou mando di altocomisario Arnhem e vision ta pa desaroya e agentenan policial como tambe parti di digitalisacion cu enfoke riba tecnologia. Den e cuadro aki KPA tin diferente proyecto den tapara y cu ta andando manera radio di polis nobo y moderno, computernan nobo, radarkamer, proyecto di camara rond Aruba, proyecto di computer den patruya policial, tecnologia pa combati crimen, entre otro.

“E meta y vision di KPA ta inverti den nos profesionalismo. E siguiente fase aki ta un stap grandi pa nos di Cuerpo Policial Aruba cu introduccion di e proyecto piloto di bodycams entrante 1 juli 2025,” KPA a anuncia.

Den e comunicado nan ta splica cu estudionan a demostra cu bodycams ta contribui na transparencia, seguridad y profesionalismo. E puntonan aki, KPA a enfatisa, ta cuadra cu e pensamento di e organisacion policial, cu tin como meta fortalece transparencia y profesionalismo cu ta aumenta e seguridad pa e comunidad y agentenan policial.

KPA a ratifica cu e proyecto aki ta uno piloto den cual polis uniforma lo cuminsa usa e bodycams y por usa e bodycams na cualkier momento den nan ehecucion di nan trabou. E agentenan policial a haya tambe presentacion di e procedura con pa atende cu e bodycams.

Pa loke ta e maneho di imagennan di bodycams KPA a enfatisa cu tin regla y procedura na luga conhuntamente cu Ministerio Publico. No por divulga of mira imagen sin cu tin autorisacion pa cu esaki y esaki ta conta tambe Cuerpo Policial Aruba pa asina brinda e transparencia y seguridad.

“Bodycams por trece desafio pa nos comunidad y cu tempo nos por custumbra cu esaki. Hunto nos ta dal un stap dilanti cu e bodycams tanto pa nos comunidad y agente policial. Den region y Aruba ta sigui crece y bira profesional. Nos tambe kier crece hunto door di inverti den e confiansa entre polis y comunidad,” KPA a subraya.