Minister di Husticia, Andin Bikker a informa cu entrante diahuebs madruga e medida di toque de queda (TDQ) no ta vigente mas.

Ademas e mandatario a anuncia algun cambio riba un di e medidanan considera mas pisa y cu a wordo introduci pa contraresta e contagio di Covid-19 na Aruba. El a bisa cu poco poco nan ta bin suavisando e decretonan cu a wordo introduci entre nan TDQ. pa loke ta e TDQ e orario a cambia, enbes di 11 anochi e ta cuminsa 12’or mey anochi te cu 5’or di madruga. Minister Bikker a bisa cu e cambio riba TDQ ta drenta na vigor entrante dialuna 25 di mei 2020.

Tambe e TDQ lo keda vigente durante 72 ora. “Esey kiermen cu madruga diahuebs no ta bay tin toque de queda mas,” el a bisa. E orario di establecimento cu aworaki nan mag di permanece habri te cu 9’or anochi a wordo extende pa 10’or anochi.

Igualmente a introduci un excepcion durante e TDQ. E tin di haci cu e personanan cu mester sali mas tempran cu 5’or di madruga pa nan bay prepara nan establecimento pa habri tempran, nan ta permiti pa sali prome cu 5’or di madruga.

Tambe minister Bikker a informa cu e restriccion pa e cantidad di persona pa bay atende entiero no ta existi mas. Mescos cu pa otro tipo di establecimento of actividad no esencial cu mag di ta habri den e fase 2 di flexibilidad cu nos ta aden actualmente.

Minister a laga sa cu finalmente por habri terasa. E ta defini e palabra como e establecimento of restaurant cu tin nan terasa habri pa atende nan clientenan pafo.

 

LEAVE A REPLY

Please enter your comment!
Please enter your name here