Entrante otro siman por haci uzo di sistema digital DOW/DIP

Diaranson mainta durante un conferencia di prensa, minister di Medio Ambiente y Infrastructura Otmar Oduber (POR) a comparti tocante e desaroyo di renobacion cu lo tuma luga den Departamento di Infrastructura y Planificacion.

Oduber conhuntamente cu representante di SOGA a firma acuerdo pa e plan di expansion y renobacion di DIP, DOW, Kadaster y tur cu ta situa na edificio lo tuma luga. Esunnan encarga cu e proyecto ta compania Freman.

E mandatario a duna di conoce cu ta trata di un acuerdo di suma importancia, mirando cu for di dia 1 di october, Ministerio di Infrastructura y Medio Ambiente a cuminsa cu proceso pa cambia na sistema digital. Unda cu tur documento interno entre e departamento concerni y ministerio lo tuma luga den forma digital.

Di e manera ey lo tin eficiencia y productividad, segun Oduber. Tambe lo aumenta e 60% di e facilidad den e proceso. “Mi ta uza e cifra pasobra ora nos a haci estudio cu hopi peticion y documento ta keda colga den departamento. Awo for di momento cu peticion drenta, e ciudadano ta haya un contesta completo”, el a splica.

Mirando cu e cantidad di tempo cu ta perde ora di haci peticion, y tambe cu tin cu bay na e parti interno, caminda e carta tin cu ‘cana su caminda’ na varios departamento di registracion, BID, minister y tur otro, pa asina e yega su destinacion, el a agrega cu e resultado di digitalisacion ta cu lo reduci tempo. Esey ta nifica cu un peticion cu antes tabata dura un luna awo por duna menos cu un siman. Si antes tabata 6 luna, awo dos luna. Anto e lo tuma luga ‘no manera antes’.

Oduber ta bisa cu esey ta pa mehora e servicio cu ta brinda na comunidad y crea eficiencia den departamento y pone responsabilidad tambe. Mirando cu e mesun proceso ta crea un ‘dashboard’ pa e minister, directornan y departamento, pa asina tin miho bista riba e documento. Lo informa mesora riba e documento, pakico e t’ey y pakico e ta pega.

“Mi ta duna elogio na tur departamento cu a forma parti bou di ministerio. Na tur cu a yuda den henter e proceso pa asisti y den pasenshi cu nos tur a siña. Awe nos ta orguyoso di e caminda cu a canando”, el a expresa.

Pa locual a firma, pa dia 15 y 16 di december binidero, e dos departamento DIP/ DOW lo ta digital pa comunidad y pa ministerio. Dianan prome di october, tur documento tabata pasa via digitalisacion interno den departamento concerni y ministerio di infrastructura. Pa dia 15 december ta e dos departamento (DIP y DOW) y comunidad. Riba dia 15 januari ta pa tur otro departamento di gobierno ‘lo ta digital tambe’.

Tambe e mandatario a splica cu tur hende cu haci aplicacion, sea yena permiso of activa un permiso di construccion, cu e expansion di DOW lo duna e servicio pa hende cu acerca pa entrega carta por yega.

Lo tin e ekipo di infrastructura cu mester ta na su luga. E intencion ta pa cada cliente haya servicio directo, caminda e persona lo haya un account manager den e departamento pa ofrece e servicio.

Unabes e persona tin e peticion aden, tin un account manager na e departamento pa percura cu e papel y documento ta canando su proceso. Si tin un pregunta, e persona mes sa na ken e tin cu bay (cerca e account manager), cu ta responsabel y mester coordina e fluho di trabou y e ta encarga cu documento cu ta entrega.

Tur hende cu haci uzo di website pa haci peticion den ambos departamento por uza un computer na su cas y sigui e stap cu tin riba e website. Automaticamente e persona por log in y registra. E persona lo haya un number y por sigui haci peticion online pa mira con leu e documento ta of na ki stap e proceso ta canando.

E mandatario a bisa cu cada persona den e departamento concerni a sigui un training necesario, esta un ‘curso pa henter e cambio di digitalisacion’. “Tur documento cu a drenta, a pone den sistema, tur a bay pa scan. E ta un inversion a tuma luga. Pa locual ta trata e hardware, software, a tuma luga y ta tumando luga pa IT support.”

E ta splica cu pa un departamento pasa pa traha den forma digital por tin su reto, pero cambio den proceso di tuma decision, firmamento di documento cu ta tuma luga den forma digital pa otro aña lo ta mas profesional y organisacion por ta sigura.

Oduber ta gradici SOGA cu a duna e sosten pa e ‘era nobo di servicio’ pa servicio ta mas eficiente y amigabel pa comunidad.