Entre anonimidad y publicidad… Kico ta e maneho…?

Un terible accidente di trafico a costa bida di dos persona. Un tragedia cu por sucede tur dia y semper ta causa tristeza y preocupacion. Pero tin caso cu ta causa mas cu esey; ora ta trata di posible o hasta obvio caso di violacion di ley den e acto, reaccion di rabia y frustracion por duna e ambiente publico otro contenido. Y den esey divulgacion di nomber y otro dato di persona posiblemente envolvi den e tragedia ta bira importante, sea ta trata di victima y mas ainda ora ta trata di persona involucra como sospechoso di delito cometi den e acto. Sigur awendia cu medionan di comunicacion digital presente na cualkier momento y capaz di divulga informacion, corecto o no, hopi mas rapido cu medionan tradicional, ta importante pa mantene un maneho al caso, cu ta reconoce e aspectonan tipico di un sociedad chikito. Den esaki, e reglanan aplica mas tanto pa autoridadnan hudicial di mantene confidencialidad tocante identidad di tal persona, loke por parce logico na un pais di miyones di habitante, na un pais di e tamaño di nos ta perde sentido. Di mes informacion ta core cu velocidad di lamper den comunidad y dado momento e negacion di autoridadnan di duna identidad di e persona no tin sentido mas y hasta ta traha contraproducente, pasobra tampoco e ta yuda contradeci posible rumor tocante e caso, cu por ta categoricamente incorecto. Na cierto momento anto lo mester pasa pa e decision di duna claridad den e caso, dunando conocimento di e identidad di e persona bao investigacion. Aki atrobe ta surgi otro momento di duda kico exactamente ta divulga, nomber completo o solamente inicial. Esaki no ta un asunto cu ta toca solamente e autoridadnan menciona; e ta un asunto tambe di maneho di medio di comunicacion, cu mester dicidi pa nan mes si ta publica nomber completo o ta limita esaki na inicialnan. Aki tin varios factor cu por hunga un papel; por ta cu e circunstancianan no ta duna claridad completo y ta haci cu cierto cautela encuanto e culpabilidad den e caso di tal persona bao sospecha ta hustifica. Al fin y al cabo, un posicion fuerte di un medio di comunicacion pa loke ta e presunto responsabilidad di e persona por causa problema posterior, si resulta cu a pesar di aresto y detencion, e persona no tabata involucra o no tabata involucra di e manera cu a supone. Esaki por conduci na daño di reputacion innecesario, un responsabilidad cu prensa en general mester atende.

Pero e criterio y normanan presenta te awor ta referi na e trato cu tur ciudadano mester por haya di autoridad y medio di comunicacion. Nos no a toca ainda e asunto mas sensitivo den e tipo di caso unda e trato igual, o al contrario trato diferente, ora ta trata di persona cu pa un of otro motibo ta considera di merece un trato preferencial. E diferencia ta surgi a base di cierto posicion den comunidad, den gobernacion o, peor ainda, dentro di e mesun cuerpo hudicial cu mester haci e investigacion y eventual persecucion penal di e sospechoso.Y ta aki tin un serie di caso unda trato preferencial a percurapa indignacion den comunidad. Aki ta bira dificil tambe pa simplemente trata preocupacion y critica for di comunidad como un obvio falta di comprension di e procesonan hudicial di banda di e ciudadano. Autoridad hudicial tin e obligacion di mantene obhetividad y trato igual na tur momento. Y loke nos por a mira a traves di e 40 aña di gobierno autonomo ta un serie di caso unda e obhetividad ey a keda poni un banda pa faborece persona cu ta pertenece na e cuerpo mes. Ta trata di accidente mortal na man di polis bao influencia di alcohol unda a move cielo y tera pa encubri e hechonan, desviando di e proceso normal di investigacion pa por constata, of no, estado di influencia di alcohol y e consecuencianan pertinente den un caso asina. Mas recientemente a trata di untiroteo cu a costa bida di un hoben ciudadano, cu a fayece bao di un yobida di bala como si fuera tabata trata di un delincuente peligroso busca pa husticia. Anto esey riba un isla chikito unda e number di auto ya lo a revela unda pa haya e sospechoso despues. Pa bon comprension: no ta trata aki di saca conclusion encuanto culpabilidad di e agentenan involucra, pasobra husticia mester caba di trata nan caso ainda. Ta bay pa e manera incomodo y poco profesional con cuerpo policial y ministerio publico ta maneha nan relacion cu comunidad den e tipo di caso aki, de paso creando nan mes e dudasi di berdad nan ta mantenetrato igual pa tur ciudadano, irespecto nan status den comunidad.

Pa bolbe na e responsabilidad di medio di prensa den maneha un politica sano den e escogencia continuo entre anonimidad y publicidad, nos no ta pretende di tin un maneho milagrosamente consistente cu ta defini bon cla den tur caso kico ta recomendable. Si bo ta desea di no aparece demasiado prematuro cu divulgacion di nomber y identidad di persona, sigui paso di e autoridadnan envolvi ta un bon decision. Sin embargo, tin momento unda tardanza den reconoce cu escala chikito di nos comunidad a tuma rienda den e asunto caba, por haci cu publica ta mas importante. Pero, e tono ta keda importante. No tin pakico practica sensacionalismo sugeriendo culpabilidad, como si fuera e caso a bay corte caba. Esey ta keda responsabilidad di cada un.