Miembronan di Comite Olimpico Arubano su Direccion di Deporte y Secretaria General Nicole Hoevertsz a atende e training camp di Federacion Gimnastico Arubano (FGA) cu tin un entrenador internacional bishita for di USA, Yin Alvarez.
E entrenador di descendencia Cubano cu su mes como atleta a mira hopi resultado internacional, ta forma parti di e team di Estados Unidos como entenador, cu tin riba su resumen tremendo resultado manera medaya di bronze na London 2012 di su atleta y yiu Danell Leyva.
Entrenador Alvarez lo traha cu atleta di tur diferente club y seleccion di Aruba durante 4 dia, unda cu hunto cu e entrenadornan di seleccion di FGA, lo pasa door di tur aspecto di gimnasia cu e atletanan. Awe a logra haci conoci cu e entrenador, compronde su obhetivo pa e training camp y asina observa su entrenamento cu nos atletanan local.
Ta desea exito na entrenador Alvarez y alabes ta duna palabra di pabien na FGA pa a logra un training camp di e nivel aki, asina desaroyando y elevando e nivel local di gimnasia.
