Na momento cu e Coronavirus/Covid-19 a bati nos porta dia 13 di maart ultimo, cantidad di hende ta bin haciendo nan sacrificio pa otro. Un grupo grandi di nan ta e trahadonan of dunadonan di cuido den e diferente cas di anciano cu nos tin rond di nos isla.

Desde cu e prome casonan di Covid-19 a wordo raporta, e prome accion cu gobierno a ehecuta tabata esun di no permiti niun bishita den e cas di dunadonan di cuido. Esaki como un medida di proteccion, ya cu nos grandi ta e poblacion mas vulnerabel. Pero no solamente no a permiti bishita, sino cu e dunado di cuido a dicidi di sacrifica nan propio libertad, y nan a keda cera cu nan clientenan pa no piki e virus afo, y evita di pone bida di nan clientenan na peliger. Un sacrificio cu no tin placa pa paga nan.

Un prueba pisa.
Pa Alejandro Yandi, kende ta manager di Cas di Cuido Oasis, e virus aki a trece varios reto, ya cu mundo henter no tabata prepara pa confronta e efectonan di e Covid-19.

Desde cu gobierno a dicidi di cera e casnan di cuido, tanto Alejandro, tambe Alejandro su casa y su mama a asumi e responsabilidad di keda cera cu nan clientenan. Nan tabatin dos empleado adicional, pero desde cu a dicidi di cera nan porta pa evita e contagio di e virus, nan tabatin dos opcion: Keda biba den e cas di cuido. Of temporalmente suspende nan trabao. Nan a dicidi e di dos opcion, ya cu nan tabatin nan propio famia cu mester atende.

Actualmente nan tin mas cu dos luna cera, y aunke nan ta realisa nan trabao cu amor y gradicimento, e ta un prueba masha pisa. “E no ta facil. E ta un situacion pisa. Mi ta kere cu niun hende tabata prepara pa esaki…,” Alejandro a bisa na Bon Dia Aruba.

E ta haya cu pa atende cu un situacion asina, nan mester ta hopi fuerte mentalmente. Y aunke nan ta mira cu e proceso di flexibilisacion di e medidanan contra e Covid-19 a inicia gradualmente, e ta consciente cu e flexibilidad aki pa e sector di cas di cuido, lo bira mas largo.

Alejandro a bisa cu asina mes cu nan lo bin cu cierto flexibilidad, nan lo sigui cu cierto regla stricto pa protege nan clientenan di cualkier contagio.

Cas di Cuido Oasis.
Oasis tin 9 aña di existencia. Alejandro su mama, Nancy Sanchez, a traha como enfermera profesional na Colombia prome cu a dicidi di bin 20 aña pasa na Aruba.

Unabes estableci akinan, Sra. Nancy a cuminsa traha den su vocacion riba tereno di cuido pa nos hendenan di tercera edad. Nuebe aña pasa, el a dicidi di bin cu su propio cas di cuido como un servicio pa nos comunidad. Cas di Cuido Oasis a bira un berdadero oasis di trankil, yen di amor y atencion pa nan clientenan.

Ta asina cu nan ta convivi cu nan clientenan cu basicamente nan a bira nan famia. “Practicamente nos ta nan famia. Nos ta convivi 24×7 cu nan.” Nan ta atende nan necesidad of kebrante di salud cu nan por tin. E situacion actual cu nan ta pasando aden pa causa di e crisis di e Covid-19 a haci cu e relacion aki a bira mas fuerte ainda. “No nos tin un welo of wela den nos cas… sino dies nos tin,” el a bisa.

Actualmente nan tin 10 cliente, esun mas jong tin 69 aña y esun mas grandi 85. Cada un di nan tin nan propio retonan producto di nan edad, entre nan Alzheimer. Pa esunnan cu ta mas consciente e pandemia aki ta trece recuerdo pa nan. Te hasta nan ta corda cu nan tata a yega di papia cu nan riba e Griep Spaño y otro virusnan cu a yega di ataca nos poblacion den pasado.

A pesar cu nan clientenan no por haya bishita, Alejandro ta gradici e gesto di Futura cu a duna nan dos tablet como donacion. E aparatonan aki a bira un bentana di contacto di nan clientenan cu nan famianan, tanto na Aruba como den exterior. Tin algun famia cu ocasionalmente for di leu y pafo di e cura di e cas di cuido, ta saluda nan ser keri interna den Oasis.

Oasis a crea un ambiente confortabel y yen di alegria pa nan clientenan. Nan ta mira television. Nan ta scucha musica. Nan ta hunga wega di mesa. Tin un señora cu problema di Alzheimer, pero niun hende por gan’e facilmente hungando domino. Otro nan no kier haci gewoon nada, y nan ta laga nan trankil. Pero algo obligatorio tur dia ta un seccion di canamento pa nan move. Tur mester cana sin excepcion. Tambe nan clientenan ta haya un baño di solo di 15 minuut tur dia.

Tin biaha entre nan mes ta discuti, ora cu un di nan ta perde of gana. Pero tambe nan ta discuti riba politica y otro temanan. “Ora cu nan ta discuti entre nan mes, mi ta hay’e positivo. Pasobra e ta un refleho cu nan ta bon y cu nan ta sinti cu nan ta bibo.”

Reflexion.
Alejandro a bisa cu e crisis di Coronavirus/Covid-19 a trece hopi reflexion pa nos humanidad. Un di nan ta cu nos mester protege y cuida nos grandi, pasobra nan ta nos memoria historico bibo. “Nan ta como nos Archivo Nacional. Nan ta conoce hopi historia di inicio di siglo pasa di nos isla. Tempo cu e medio di transporte tabata e buriconan.”

 

Na final, Alejandro Yandi a manda palabra di felicitacion y perseverancia pa nan coleganan di e cas di cuido di nos grandi kendenan tambe ta confronta situacion di reto aki cu no ta nada facil y di hopi trabao.