E comerciante Benjamin Pick, conoci popularmente como “Benchi” ta un persona amabel, senciyo y servicial. E ta un comerciante legendario di caya grandi desde cu el a asumi for di su tata, Lejbuz (Laybuz) Pick, miho conoci como “Chipichipi” e maneho di e negoshi emblematico La Moderna.

La Moderna tin mas cu 80 aña di existencia. E tempo aya no tabatin notario y nada tabata documenta. Benchi, kende recientemente a ricibi for di man di minister di Finanzas y Asunto Econmico, Xiomara Maduro, un reconocimento den nomber di Gobierno di Aruba ta testigo clave di historia y evolucion di caya grandi cu a yega di conoce diferente nomber: Nassaustraat, Caya Grandi di Playa y awor Caya G.F. ‘Betico’ Croes.

Un caya comercial cu a conoce su retonan, principalmente durante e ultimo añanan. Aunke e ta un caya bunita cu a pasa den full un transformacion den su infrastructura y cu tin un bunita tram, pero gran parti di su splendor comercial a bay perdi.

P’esey e ta haya cu intencion di gobierno pa bin cu full un campaña di ‘Cumpra Local’ ta bon. “E manera ta bon. Pero e ehecucion tin cu sigui awor,” el a bisa.

Tambe e ta haya cu despues cu e temporada Pasco y Fin di Aña pasa, nan mester sigui e tipo di campaña aki. “No haci’e december so pasobra ta Pasco.”

E ta considera importante den e tipo di campaña aki, e sentimento di rebiba e historia di nos pueblo. E nificacion di caya principal y su comercio. E ta haya cu e ta pa nos mes ya cu “Aruba tin cu mantene Aruba cu orguyo.”

Pa haci esey posibel, cada un di nos tin cu aporta na Aruba. Pues e ta haya cu esaki ta nifica un positivismo, principalmente den e situacion cu nos ta pasando aden. Pero e mester bira un lucha di cada un di nos pasobra “nada ta bin por nada.”

Union comercial

E ta lamenta cu no tin un union comercial den caya. E ta mira cu pa ultimo añanan no tin union mas. E mes cu tin practicamente henter su existencia den caya grandi no conoce e nobo nan cu ta drenta y cu awor hopi ta sali. “Pasobra nan ta core pa e realidad.”

Cu hopi respet e ta sinti cu esunnan cu ta bay, nan no ta duna balor na e clientenan cu ta drenta den nan negoshi. A base di su experiencia comercial Benchi su filosofia ta cu si un cliente ta bin cumpra un cos e kier pa wordo: 1. atendi decentemente 2. cordialmente 3. Dun’e un cos di balor. “No gañ’e un cos cu tin un balor cu abo ta pone. No!” Segun Benchi, e hendenan cu ta bin Aruba ta bini Aruba pa su cortesia. Pa e noblesa di un Arubiano. “Bo no ta paga pa e cos ey. Absolutamente cu no,” asina Benchi a bisa durante e entrevista aki.

E ta haya cu esaki ta un cos cu ta den nos sanger y cu bo ta nace practicamente cune. No na scol, sino cu bo ta nace cune y na mesa unda bo ta sinta cu bo mayornan, rumannan y famia, eynan bo ta haya educacion. “E resto ta na scol. Y si bo no ta lesa bo no ta compronde… y si bo no ta compronde, bo no por bay dilanti,” segun Benchi Pick.

Pandemia

E ta mira cu e lucha actual cu nos ta hibando pa causa di e pandemia ta nifica tambe cu mester traha duro pe, pero na final e cosecha alfin bo ta wak. E no ta descarta cu e cosecha por dura un tiki mas cu e normal.

Nos no mester lubida -segun Benchi Pick- cu e pandemia aki a causa un efecto negativo di hopi cos malo. E ta duna danki na Dios cu e team cu ta trahando na fabor di salubridad ta realisando esaki consciente y dinamicamente. Pero specialmente nan ta realisando un trabao profesional hopi bon. “Ami ta puntra mi mes. Si e ministernan y parlamentarionan cu ta atende cu e situacion aki, nan ta sosega?”

E ta haya cu den cuadro di e pandemia di Covid cada un di nos tin su responsabilidad. Den su caso tampoco e no ta drumi pasobra e mester worry kico e mester haci pa su negoshi. Tambe kico e mester haci pa salvaguardia su salud, no solamente pe pero tambe pa su empleadonan y nan clientenan.

“Nos tur tin balor. Nos tin un Dios, pero nos tin e mesun balor na Dios,” el a expresa.

Tambe Benchi ta kere cu nos mester traha pa sobrevivi y pa controla e malesa aki mas pronto posibel. Pa logra esaki e ta conseha pa comunidad sigui e reglanan cu DVG a trece dilanti pa guia nos. Ya cu nan ta hendenan profesional cu ta dedica nan tempo y sabiduria no pa nan so, pero pa henter pueblo di Aruba. Ademas nos bon comportacion ta bira un bon ehempel pa esnan cu ta bishita nos. Pasobra ora cu nan ta bay bek nan por bisa orguyosamente cu Aruba ta bon y cu su hendenan ta consciente. “Aruba su hendenan ta hendenan drechi. Pober of rico no tin nada di haci cu esaki. E humanidad pa conkista e malesa aki ta e balor mas grandi cu nos tin pa nos pueblo,” asina cu sabiduria el a laga sa.

Den e lucha aki -segun Benchi Pick- nos tin cu sigui riba e mesun ritmo. E vacuna ta na caminda, pero e no ta kere cu esey ta e solucion. “Pasobra ora cu bo traha bo fundeshi e muraya tin cu bay halto” Cu esaki e kiermen cu ainda nos ta den e fundeshi…

LEAVE A REPLY

Please enter your comment!
Please enter your name here