Awa sostenibel ta mustra un palabra grandi y hopi leu di nos realidad. Principalmente si nos ta biba den un isla rondona di lama infinito cu ta conta cu un planta di desalinacion cu pa decadanan a produci awa di bebe di bon calidad.

Awa limpi ta parti di e 17 obhetivonan cu Asamblea Nacional di Nacionnan Uni a adopta den su agenda 2030 como meta di Desaroyo Sostenibel Global (SDG). For di varios aña pasa, un yiu di tera cu un trayectorio profesional largo na servicio di WEB N.V. riba produccion y calidad di awa, a bin mustrando su preocupacion y interes rond di e tema aki pa percura awa sostenibel pa e generacion futuro. Ta trata di Prof. Dr. Ir. Filomeno (Boey) Marchena.

Sr. Marchena a cuminsa desaroya educacion riba maneho di awa. Na 2016 el a bin cu e catedra: Sustainable Water Technology and Management den e facultad di Ingenieria na University Of Curaçao. E catedra aki cu ta conta cu respaldo di UNESCO ta encera investigacion y educacion riba full e ciclo di produccion di awa. “E cos importante di e catedra ta seguridad di awa pa seguridad di cuminda,” el a bisa

 

Durante un entrevista cu Bon Dia Aruba, Sr. Marchena a splica cu e obhetivo tambe ta pa bin cu sistemanan pa agricultura sostenibel y proteccion di ecosistemanan y medio ambiente. Igualmente pa proteccion di ecosistema di e costanan marino. E asunto aki tin di haber cu nos realidad Caribense specialmente den e islanan chikito seco y semi-seco den desaroyo cu casi no tin fuente natural di awa dushi.

Con sostenibel awa ta den nos region Caribense? El a laga sa cu tin islanan grandi mas panort cu tin fuente di awa dushi manera riu. Pero e sostenibilidad di awa di bebe den un isla manera esun di nos cu ta semi-seco, practicamente no tin fuente natural, unico cos cu nos ta depende di dje ta desalinacion di awa di lama. E ta costoso, pero e reto ta esun di hacie mas eficiente posibel. P’esey Sr. Marchena a pensa riba enseñansa. Esta bin cu un catedra cu ta enfoca riba tecnologia y maneho pa sostenibel di awa.

Inicio

E hecho cu Aruba tin un planta di produccion di awa y coriente cu ta wordo opera di un forma eficiente ta haci cu e profesionalnan tras di esaki ta duna presentacion pa otro profesionalnan internacional cu ta bin nos isla pa comparti conocemento riba tereno hidrologico.

Tambe na 2005 a wordo lanta un plataforma di e utilities di Antia, kiermen cu participacion di Aruba, Bonaire, Corsou y St. Maarten. Despues Surinam tambe a forma parti di dje. Den e plataforma aki Sr. Marchena a keda encarga cu e grupo di trabao di produccion di awa. Pero tambe el a haya bao su encargo e presidencia di e grupo di trabao di investigacion.

Den e añanan ey hunto cu Keurings Instituut voor Waterleiding Artikelen (KIWA) cu ta un instituto di investigacion di awa na Hulanda, nan kier a lanta un centro di investigacion tocante produccion y distribucion di awa den nos region di Reino Hulandes. Esaki tabata e periodo cu Sr. Marchena a propone pa lanta un catedra di awa na Corsou.

Dicon na Corsou y no na Aruba? El a splica cu Universidad di Curaçao, ya caba tabatin un facultad tecnico cu lamentablemente esun di Aruba no tin. El a bisa cu su intencion inicial tabata pa haci’e na Aruba hunto cu Corsou. “Pero Universidad di Aruba no tabatin mucho interes.” Pero tambe nan tabata argumenta cu nan no tabatin un facultad pa sostene un catedra asina.

E ta spera cu e cooperacion academico aki lo por bini, mirando cu nan ta pendiente cu dos investigacion basta grandi cu Universidad di Curaçao. Pero e ta lamenta cu ni na Aruba y tampoco na Corsou, gobierno no tin un fondo destina pa guia e tipo di investigacion aki riba un asunto vital y fundamental cu ta awa.

Catedra

Den nan prome intento pa bin cu e catedra na Universidad di Curaçao, e ta reconoce cu nan tabata academicamente mucho ambicioso den bon sinti di palabra. Nan a traha full un programa y tambe un sorto di curriculum pisa. Na november 2008 ora cu nan a presente, e sugerencia cu nan a haya tabata pa bin cu un programa mas chikito na nivel di scol tecnico secundario. Sr. Marchena hunto cu e decano di e facultad Dr. Richenel Bulbaai a keda un poco desapunta… pero no desanima.

 

Otro acontecimento importante a sosode na 2008. Sr. Marchena a wordo apunta door di gobierno di Aruba como e focal point di UNESCO na Aruba. For di e aña aki a cuminsa un fase nobo p’e. E funcion aki tabatin di haber cu e programa hidrologico internacional di UNESCO.

E ta corda cu e tempo aya e tendencia tabata bay den direccion di produccion di awa cu e sistema di osmosis inversa. Ex director di Santa Rosa, Tilo Dabian a propone na gobierno pa nombra Sr. Marchena como su reemplasante den e responsabilidad aki cu UNESCO.

Trahando cu UNESCO y dunando presentacion, Sr. Marchena a haya hopi aprecio pa su manera di traha. Casualmente e tempo aya el a wordo invita pa duna un presentacion den un conferencia di awa na Paraguay dor di UNESCO. E evento aki a bira un escenario pa Sr. Marchena presenta cu hopi emocion nan idea, obhetivo y curriculum di e catedra. Pero na final Dr. Maria Donoso kende tabata directora di Ciencia di International Hydrological Programme for Latin America and the Caribbean (PHI-LAC) a bise cu hopi dolor cu nan tabata seis luna laat.

Tabata 2008, aña di crisis financiero, caminda UNESCO a tuma e decision di no financia niun catedra mas, y tampoco duna niun apoyo financiero. Pero si el a recomenda Sr. Marchena y Dr. Bulbaai pa busca formalmente e titulo di catedra UNESCO, ya cu e nomber aki ta duna mas peso na e catedra. Pa medio di e titulo aki, eventualmente hopi compania lo por ta interesa pa financia e proyecto aki.

Pa logra e obhetivo aki Sr. Marchena a traha hopi duro cu Oficina di UNESCO na Curaçao pa entrega e proposicion na tempo di e catedra: UNESCO Chair Sustainable Water Technology and Management. Pero e proposicion aki a keda drumi pa varios aña. Practicamente e instancianan aki a lubida riba e proposicion aki.

Pero tur cos ta sosode pa algo. Awendia Sr. Marchena ta reconoce cu e tempo aki tabata uno di suerte. Pasobra si nan tabata haya aprobacion mesora, Sr. Marchena su chens pa conkista e rango academico di ‘Professor’ como condicion fundamental pa institui e catedra, no tabata factibel.

Na 2009 y danki na intermediacion di Dr. Bulbaai, Sr. Marchena pa logra tuma contacto cu Prof. Ir. Johannes I.M. (Joop) Halman di Twente University. Haciendo uzo di investigacion cu el a yega di haci nan WEB, Sr. Marchena a traha su tesis “Efficiency Improvement of Seawater Desalination Processes: The Case of W.E.B. Aruba N.V. on the Island of Aruba.” Cu e tesis aki cu ta enfoca riba proceso di calidad integral cu el a diseña pa haci e planta di desalinacion mas eficiente, Sr. Marchena a logra su titulo di Professor. Den e tesis e ta considera e aspecto humano, fisico-kimico , mantencion y innovacion. Sr. Marchena su titulo nobo como ‘professor’ a bira paspoort academico pa establece e catedra di awa na University Of Curaçao.

Na november 2016 e facultad a wordo institui cu tur su curriculum pa un educacion riba maneho di recurso di awa. Pero pa falta di recurso financiero nan a pidi pa e traha un minor pa evalua si tur facultad por hacie. Pero proceso burocratico ta tuma su tempo keto bay. Tambe Sr. Marchena a propone pa bin cu un associate degree di dos aña pa alumnonan di scol tecnico secundario. Despues di dos aña e alumnonan ta evalua si nan kier sigui dos aña mas di e catedra pa su bachelor.

E aña aki ta wordo cumpli cu 4 aña pasa Prof. Dr. Ir. Filomeno (Boey) Marchena a logra institui e catedra: UNESCO Chair Sustainable Water Technology and Management den e facultad di Ingenieria di Universidad di Curaçao. Ainda Sr. Marchena ta corda cu ora el a duna su charla inaugural, el a reconoce cu e ta un hende cu no ta gusta warda, pero e biaha aki si el a bale la pena.

El a trece den forma di reflexion un frase inspirativo cu Dr. Moises Da Costa Gomez a yega di pronuncia tocante awa tempo cu e tabata Presidente di Gabinete pa Antia Hulandes: “E bondad di mas grandi ta manera awa. E bondad di awa ta, cu e ta probechoso na dies mil cos sin competi. Kedando meramente sin competi, nos ta keda liber di critica,” Tau-Te-Tsing VIII

 

 

 

 

 

LEAVE A REPLY

Please enter your comment!
Please enter your name here