(AFP) – Diripiente, mundo a cay den un scuridad inusual, color biña. Temperatura ta baha, parha y otro animal, spanta pa un anochi inespera, ta cuminsa actua straño. Strea y planeta ta aparece den shelo banda di e Solo tapa.
Esaki tabata e bista asombroso cu a atrae hende for di henter mundo na nort di Spaña diaranson, pa observa un eclipse solar total.
“Hende ta bira adicto na dje pasobra e ta un experiencia asina conmovedor,” segun Lucie Green, un di cuatro persona cu ta describi su mes como “eclipse chasers”, kende a papia cu AFP prome cu e evento.
Mira Solo ta particularmente special pa Green, un fisico solar na University College London kende tabata cla pa mira e eclipse for di un boto cerca di e isla Spaño di Mallorca.
E ta apenas un miembro di un comunidad creciente cu ta planifica nan vakantie rond di e oportunidad pa mira eclipse solar total, cu por ser mira den diferente lugar rond mundo cada par di aña.
Mientras un eclipse parcial tabata visible na gran parti di Europa, Nort America y nort occidente di Africa diaranson, eclipse chasers ta purista den nan buskeda di “totalidad” – ora e Luna ta tapa e solo completamente.
Totalidad ta visible solamente den un pida estrecho di Tera, cu usualmente ta rekeri plan di biahe complica y caro. Sinembargo, e evento diaranson – e prome eclipse total visible den continente Europeo e siglo aki – a proba di ta un biahe mas facil.
Ryan Milligan, un fisico solar na Queen’s University Belfast na Nort Irlanda, a biaha pa 12 diferente eclipse, na lugarnan asina leu manera Siberia, Chile y Faroe Islands. Diamars, Milligan tabata na e ciudad Spaño di San Sebastian, unda 99,7 porciento di Solo a keda tapa. “No ta suficiente cerca!” segun Milligan, kende tabata bayendo e ciudad di Burgos, unda totalidad a dura un minuut y 43 seconde. “Un eclipse total no ta algo bo ta mira, e ta algo bo ta experencia,” el a bisa AFP. “Temperatura ta baha, luz y sombra tur ta den e lugar robes, colornan ta bira scur, tin un bahada di solo di 360 grado, e bestianan ta bay drumi – tur esaki bo no por transmiti na hende mediante un potret of un video of un articulo di noticia,” Milligan a bisa.
Algun chaser ya ta planificando pa un eclipse total dia 2 di augustus otro aña.
Cerca di Luxor, cas di e Valle di Rey na Egipto, totalidad ta bay dura seis minuut y 22 seconde – esey ta bay ta e eclipse mas largo cu humano lo por mira te cu aña 2114.
