Desde algun siman pasa Aruba ta experenciando un epidemia di Parvo unda cu na Animal Care Clinic tabata atende cu 15 caso pa dia, sinembargo e brote aki a cuminsa baha si. Locual cu a hala atencion ta cu e parvo a bira mas fuerte, pues cu e ta matando hopi mas cacho cu ta custuma cun’e. Esaki ta informacion cu nos a ricibi for di Veterinario Natalie Booi di Animal Care Clinic.
“E virus di parvo ta afecta cachonan chikito pues te cu un aña di edad bo cacho ta core riesgo mas halto pa contagia cu esaki. P’esey e ta hopi importante pa e cachonan wordo vacuna for di 6 siman caba y ontworming pa tin tripa limpi. Cachonan cu tin carpata y ta mal nutri tambe ta core riesgo pa haya parvo.” Algo cu Sra. Booi ta ripara ta cu cachonan ta wordo separa hopi lihe for di nan mama. Ta importante pa no kita un cacho chikito for di su mama, pasobra mescos cu e ser humano, cacho ta beneficia di nutricion y anti cuerpo cu e ta haya bebiendo lechi for di su mama. Algo cu ta importante den e caso aki tambe ta pa e mama ta vacuna, ya ora cu e yiunan nace, nan tambe ta nace cu e anti cuerponan aki. Asina cu ora nan wordo vacuna, nan ta mas fuerte.
No sali keiro cu cacho chikito
Un fout cu hopi hende ta haci, ta keiro rond cu nan cacho chikito den auto, na cas di hende y beach henter dia, esaki ta algo leuk berdad pero no ta e luga pa un puppy. Sra. Booi ta haci e comparacion cu ora tin un baby recien naci tampoco ta hibe tur caminda henter dia, pues ta e mesun manera mester trata e cacho chikito. Parvo ta un virus den aire y bo no sa unda e ta bay den contacto cu sea ta un otro cacho infecta of unda cu ya tabatin un cacho infecta.
Costo veterinario
E ta un realidad cu un bishita na e veterinario por ta costoso. P’esey Sr. Booi ta recomenda pa vacuna e cacho, pasobra si e bira malo di algo cu por a wordo evita lo gasta e costo di un vacuna, kisas cada dia cu e cacho ta malo. “Tambe locual cu mi ta ripara ta cu doñonan di bestia ta warda hopi pa trece un cacho malo na veterinario, esaki como cu nan ta purba wak si e cacho ta cura prome. Consecuentemente ora cu nan trece e cacho e ta hopi malo y e gasto lo ta hopi mas y tin ora sin garantia cu e cacho lo sobrevivi. Na Animal Care Clinic nan tin un start plan unda cu doñonan di bestia por deposita un suma di placa y asina ora cu algo pasa cu nan bestia, nan sa cu tin un suma disponibel pa esaki y e no ta un gasto diripiente,” Sra. Booi a splica.
No tin cura
Parvo ta un virus cu no tin cura, ta mescos cu un hende ta keda haya griep cu tampoco tin un cura, esey ta haci’e fastioso. Unabes na un cas tabatin un cacho cu parvo mester percura pa desinfecta e area unda e cacho tabata hopi bon cu clorox pa mata e virus. E virus por sconde facil den, beton y mata cual ta haci cu unabes tabatin parvo na un cas, e famia por haye cu mas cacho cu nan haya ta haya parvo.
Awasero
E virus ta aparece mas hopi asina cu awa yobe na Aruba, e ta algo cu a custuma cun’e. E parvo tin diferente tipo y no ta tur ta mesun fuerte. Te cu algun siman pasa tabata haya casonan di parvo unda cu e cachonan tabata scapa, sinembargo e ola di parvo e biaha aki tabata hopi fuerte y hopi cacho ta fayece a consecuencia di esaki, Sra. Booi a splica.
Sintomanan di parvo
Prome sintomanan di un cacho cu tin parvo ta cu e cacho tin perdida di apetit, sacamento y diarea cu sanger cu un holo hopi fuerte. Esakinan ta haci cu e cacho ta deshidrata y cu e por fayece door di esaki. Un persona no por contagia cu e virus aki pero por transporta e virus si y e virus ta hopi contagioso, special ora cu bay den contacto cu e af di un cacho. Pues algo hopi importante ta pa mantene e cacho hidrata. Ora cu malesanan asina aki afecta cachonan di cas, semper nos sa puntra nos mes dicon cachonan crioyo no ta haya esakinan. Segun Sra. Booi a splica ta pa motibo cu cachonan crioyo ta mucho mas fuerte contra diferente malesa como cu ya nan den un estilo di bida di “survival”. Cachonan cu ta biba riba caya ta bira automaticamente mas fuerte y ta keda pasa e anti cuerponan aki pa proximo generacion tambe cu ta haci cu ya nan ta nace cu cierto inmunidad natural.
Recomendacion
Un recomendacion di cuido di un doño di cacho cu a haya parvo y e cacho a sobrevivi esaki ta lo siguiente. Hiba e cacho mas lihe cu ta posibel cerca un veterinario, preferibel e prome dia cu ripara cu e cacho su comportacion cu su cuminda of apetit a cambia. Si e cacho ta saca of tin diarea, aplica locual cu ta conta tambe pa e ser humano, cual ta percura pa e no deshidrata y keda dun’e likido a pesar cu e saca esaki. Algo cu a yuda “Diva” sobrevivi sigur ta e “infuus water” cu ta percura pa e keda hidrata. A pesar cu e ta rekeri tempo y atencion di e doño, el a yuda e cacho pa no perde forsa te ora cu su apetit a habri bek y a cuminsa come y bebe manera normal.
