Siman pasa a keda conoci e cancelacion di e evento Caribbean Sea Jazz Festival, cu tabata tuma luga na september di aña aki, y cu durante 12 aña tabata un di e festivalnan local mas largo organisa na Aruba, a conta cu sosten di musiconan local y a duna oportunidad pa trece show di nivel internacional cu artistanan reconoci.

Bon Dia Aruba a haci un entrevista cu Erik Eman, kende ta organisado di e evento, y el a splica e motibo di cancelacion di evento e aña aki.

Eman a manifesta cu e festival a cuminsa na Cas di Cultura 13 aña pasa, sin sponsor y sin otro tipo di ayudo. A medida cu añanan a pasa e festival a crece, y na 2012 nan a haya e oportunidad pa muda pa e areanan di Renaissance Marketplace, y asina tambe a crece e contribucion di tur sponsor.

Eman a specifica cu Aruba Tourism Authority, cu tambe tabata apoya e festival aki, a hisa su patrocinio na midi cu e añanan a pasa, pero e crecemento di e evento no tabata asina lihe. Segun Eman a expresa: “Mi ta kere cu e ultimo dos aña, nos no a logra e target cu ATA a pone pa nos”.

A pesar cu nan como organisado di e evento a haya un multa pa esey, el a bisa cu nan a paga e multa pa motibo cu e contract tabata bisa un suma, pero e ultimo aña nan no a logra haya e cantidad rekeri.

Pa e motibo aki, Eman a splica cu desafortunadamente e organisacion no a haya e biaha aki e apoyo di ATA como sponsor principal di evento, aunke e subsidio cu nan a pidi tabata mesun cantidad cu aña pasa, y nan como organisado mester di un tempo extenso pa publica tur e artistanan cu por asisti y asina e turistanan cu kier asisti por planea nan biahe pa Aruba.

Di mesun manera, Eman a informa Bon Dia Aruba cu e evento aki tin un balor artistico, cultural y educativo, y no por ta compara cu otro concierto, pa motibo cu tin tres tarima y hopi cos di calidad pasando rond dje.

Pa finalisa, Eman a expresa cu aunke e aña aki no lo tuma luga e Caribbean Sea Jazz Festival, nan lo ta organisa otro evento chikito di jazz & blues hunto cu Universidad di Berkeley, cu lo bishita e isla pa scout na Casibari dia 20 y 21 di september proximo, y asina lo por sigui cu e preparacion di e Caribbean Sea Jazz pa e proximo aña.