E famoso caso di ‘Panama Papers’ a expone un presunto estafa organisa pa Egbert Koolman y su ex casa Evarina Koolman, esaki segun un noticia cu a keda publica riba e website di Miami Herald. Koolman lo a haci uzo di servicio di e bufete di abogado Mossack Fonseca (MF) pa crea un compania offshore y asina sistematicamente ‘fix’ su mes.
Den su posicion cu e compania di telefoon estatal Setar, Koolman tabata encarga pa cumpra telefon di proveedornan rond mundo cu na su turno ta wordo rebendi na consumidornan di Aruba. Segun e articulo amplio di Miami Herald, Setar lo a declara na nan cu Koolman a defrauda e compania decenas de miyones di dollar door di acepta soborno di proveedornan di telefon movil situa na e parti zuid di Florida. Koolman lo a cera contractnan na prijsnan infla, cual lo tabata 20% mas caro cu e prijs di mercado y na su turno tabata wordo recompensa. Te ainda no ta cla cuanto placa exactamente a keda ‘horta’ door di Koolman. A keda constata tambe cu e aparatonan tabata ‘refurbished’ y algun tabata hasta contene material pornografico.
Operacion
Pa mas cu 10 aña e ex-empleado di Setar a haci su operacion sin cu e compania a tuma nota di esaki. Ta te na momento cu Koolman su nomber a aperece den e leak di ‘Panama Papers’. Na momento cu esaki a pasa, e manager di Setar a confronta Koolman cu esaki y nan lo a haci un audit pa wak kico ta pasando. E audit a conduci na retira Koolman di su trabou despues cu a constata cu e persona aki lo abusa e poder di su posicion.
Segun Miami Herald, Koolman a uza e placa ricibi di soborno pa medio di su compania offshore situa na British Virgin Islands cu ta opera bou e nomber 3DK Consultant Corp., pa por entre otro drecha su cas na Aruba, traha pool y cumpra panelnan solar; tur esaki balora na mas cu 35 mil dollar. Tambe a resulta cu aparentemente Koolman lo a cumpra un auto pa su yiu na balor di 10 mil dollar y hasta a uza e compania di cargo cu Setar ta cliente di dje pa manda su mesun pedidonan pa Aruba.
E compania 3DK Consultant Corp. tabata tin en total 4 shareholder di cual ta e ex-casa, e dos yiunan y Koolman mes. Den un e-mail a resulta cu e ex-casa di Koolman lo a tuma contacto cu MF na aña 2015 pa cera e compania despues di a ricibi un cobransa ya cu segun e, e compania no lo ta operando pa algun tempo caba. E dama lo a bula bay Panama pa asina wak con ta regla e asunto segun e articulo ta bisa.
Caso den corte
Na e momento aki Koolman ta biba na un cas situa na Hialeah Florida aunke cu bo no por tuma nota cu e lo ta disfrutando di e bonanza. No tin niun compania of propiedad registra na su nomber den e estado di Florida. Miami Herald lo a tuma contacto cu Koolman diabierna cu a pasa pero no a ricibi un contesta di dje. Segun archivonan di e corte federal, te na e momento aki e no a contracta un abogado pa defende.
Segun e abogado di Setar na miami, Benton Curtis, cu ta traha pa e bufete de abogado Broad y Cassel, e evidencianan fuerte di e caso aki ta indica cu Koolman, hunto cu diferente otro co-conspiradornan, a estafa nan cliente y realmente e pueblo di Aruba miyones di dollar durante di mas cu un decada. No tin duda cu Setar lo ta hibando e persona aki y mas compania tambe corte pa asina purba recobra e placa perdi.
Bon Dia Aruba lo tuma contacto cu e director di Setar riba e asunto aki ya cu nos ta papia di sumanan basta grandi cu na final di dia ta costa e pueblo tambe.
