E fundador di un compania di nanotecnologia a ser aresta diaranson bao cargonan di fraude, despues cu autoridadnan a bisa cu el a acepta mas di $12 miyon for di inversionistanan cu a wordo bisa cu NASA tabata yudando e desaroya un breathalyzer pa detecta cancer y narcotico.

James Jeremy Barbera di 64 aña di edad, ex CEO di Nanobeak Biotech Inc., originalmente yama Nanobeak, a keda den libertad condicional pa $1 miyon di fiansa, despues di presenta den corte federal na Manhattan, unda e ta enfrenta cargonan di conspiracion, fraude di seguridad y di placa, cu un potencial castigo di varios decada den prison.

Segun e documentonan di corte, el a gaña decenas di inversionista desde 2013 bisando nan cu su compania a usa tecnologia desaroya pa NASA pa crea un breathalyzer [red: e mashin di supla pa detecta alcohol] cu tecnologia di sensor cu por detecta cancer y narcotico.

Fiscal interino, Audrey Strauss a bisa den un declaracion cu Barbera a gaña inversionistanan bisando cu un inversionista institucional tabata abordo, incluyendo un compania grandi di kimico, cu acuerdonan di licencia tabata den proceso, y cu un oferta publico inicial di accionnan tabata probabel.

“Manera ta acusa, James Barbera a estafa inversionistanan di miyones di dollar door di ofrece e oportunidad di inverti den un tecnologia aparentemente posibel pero enteramente ficticio, supuestamente desaroya den coordinacion cu NASA”, el a bisa.

William F. Sweeney Jr., cabesante di oficina di FBI di New York, a bisa cu Barbera a gasta mita di e placa di inversionistanan riba scol priva y universidad pa su yiunan, y pagonan di hypotheek pa su apartamento banda di Central Park na Manhattan.

Mientras tanto, el a declara falsamente cu e tabatin un acuerdo exclusivo cu NASA y a usa e logo di e agencia pa solicita inversionista, autoridadnan a bisa. “Manera nos a demostra awe, e ‘exclusivo’ no-existente di Barbera awo a dun’e nada otro cu un biahe den e sistema di husticia criminal federal”, Sweeney a bisa.

Autoridadnan tambe a bisa cu e gastonan di Barbera a inclui $5,400 den spa y salon di beyesa, $4,400 pa gastonan relaciona cu mascota, y $477mil na dos ex-esposa di Barbera, su esposa y su yiunan muhe.

Na juli 2014, e US Securities and Exchange Commission y Barbera a resolve acusacionnan separa di fraude cu seguridadnan civil contra Barbera, prohibiendo e di violacionnan futuro di leynan di seguridad mientras el a bay di acuerdo pa paga un penalty di $100mil y nunca mas actua como oficial of director di un compania publico.

SEC a trece cargonan nobo dilanti diaranson na corte federal na Manhattan, bisando cu e comentarionan di Barbera hacia inversionistanan tabata falso y engañoso pasobra e aparato di sensor di NASA ta diseña pa diagnostica diabetes, no cancer ni droga.

A bisa cu NASA y Nanobeak a firma un acuerdo di licencia na 2013 pa desaroya e aparato pa usa den deteccion di cancer y narcoticos, y Nanobeak a paga NASA alrededor di $340mil, pero tur trabao riba e tecnologia proponi a stop pa fin di 2017 pasobra Nanobeak no a logra paga completamente pa e investigacion.

SEC a bisa cu Barbera falsamente a bisa sikiera un inversionista cu Nanobeak tabatin acuerdo cu algun departamento di sheriff local na Florida y Colorado, tabata trahando riba un acuerdo cu departamento di polis di Los Angeles, y cu agencianan di cumplimento di ley tabata kier a cumpra tecnologia di sensor di Nanobeak.

De hecho, SEC a bisa, Barbera tabatin acuerdo solamente cu algun departamento di sheriff local pidiendo pa nan acepta muestranan gratis di e sensor pa test unabes cu esaki tabata funcional y disponibel.

SEC a bisa cu Barbera ademas falsamente a pretende di ta un ex-cientifico di NASA na momento cu anteriormente a testigua cu e tabata traha solamente como assistent di investigacion na un programa afilia cu NASA na New York.

LEAVE A REPLY

Please enter your comment!
Please enter your name here