Ayera minister di Finanzas, Asunto Economico y Sector Primario, Geoffrey Wever, a ricibi e estudio final riba e riesgonan, obstaculonan y oportunidadnan di e sector di FINTECH pa Aruba y evaluacion di e impacto di “Blockchain Technology” y “Crypto Currency”. E siguiente pasonan ta e presentacion oficial di e estudio na stakeholders.
Pa pusha e desaroyo di FINTECH na Aruba, hunto cu Hulanda via e Landspakket lo traha riba e strategia di implementacion di e estudio di FINTECH pa Aruba realisa pa “United Nations Economic Commission for Latin America and the Caribbean” (UN ECLAC).
FINTECH of Technologia Financiero ta referi na tecnologianan innovativo y solucionnan digital cu ta wordo aplica den e sector financiero pa haci servicionan financiero mas eficiente, accesibel y facil pa uza. Como meta di e maneho economico pa crea mas sectornan economico, minister Geoffrey Wever via su presupuesto a financia e estudio aki realisa pa UN ECLAC.
Como parti di e estudio, UN ECLAC a reuni diferente partners manera Banco Central di Aruba, Camara di Comercio, ATIA, Setar N.V., Cybersecurity Center of Excellence, Insurance Association of Aruba, Aruba Bankers Association, Digicel, Directie Telecommunicatie Zaken, Qredits Aruba, Gamma IT y diferente personanan clave den e sector di FINTECH.
Meta di e reunion aki tawata pa haya un bista realistico di e posicion actual di Aruba den e sector FINTECH pa asina tin mas conocemento di e impacto economico di tecnologianan innovativo y solucionnan digital nobo den e mundo comercial impacta pa cambio y desaroyo continuo. Esaki ta un proyecto cu a inicia mas cu un aña pasa. Cu entrega oficial di e resultado na minister Geoffrey Wever, UN ECLAC lo duna un presentacion oficial na tur partners cu a contribui na haci e estudio un exito.
Minister Geoffrey Wever ta gradici UN-ECLAC pa e estudio realisa y tambe Departamento di Asuntonan Economico cu ta guia e proceso di e estudio relevante pa desaroyo economico di Aruba. Maneho economico pa crea sectornan nobo ta tuma su tempo. Awor cu e estudio ta finalisa, e siguiente paso lo ta traha e strategia di implementacion via Landspakket y ehecuta esaki pa asina na un manera concreto pusha e diversificacion di Aruba su economia segun minister Geoffrey Wever.
