Recientemente, Minister Endy Croes a reuni cu Sra. Omaira Lares y Sra. Gabrielle Croes di Departamento di Recurso Humano (DRH). Durante e encuentro a trata restructuracion di e aparato gubernamental y e ministerionan.
Segun un comunicado di gobierno, Gabinete Wever-Croes II desde inicio di gobernacion ta tumando pasonan pa haci e aparato gubernamental mas eficiente y pa mehora mas ainda e servicio na nos ciudadanonan. Un di e recomendacionnan di e Landspakket ta pa haci un estudio di tur e departamentonan di gobierno. E estudio aki a ser realisa pa PriceWaterhouse Coopers (PWC), entre otro, di e tareanan cu e departamentonan mester haci, cual por acopla na otro y cual no ta un tarea directamente di gobierno. Tambe, a pone atencion na e tareanan cu lo por wordo privatisa.
Pa loke ta trata Ministerio di Enseñansa y Deporte tin nuebe (9) departamento cu a pasa den e proceso aki.
Siman pasa, Minister Endy Croes y Conseho di Minister a ricibi e prome conclusionnan di e estudio despues cu PriceWaterhouse Coopers (PWC) a reuni cu tur e departamentonan. Hunto cu DRH lo tuma cierto decisionnan den e fase aki, entre otro, kico en realidad ta e tarea di gobierno y kico kisas no ta un tarea di gobierno. Pa conclui, mandatario di Enseñansa y Deporte a indica cu e tabata un bon reunion unda cu a repasa e nuebe (9) departamentonan cu ta resorta bao di su ministerio y a duna contribucion den e proyecto aki.
