Un estudio cientifico internacional publica recientemente a identifica Aruba como un di e paisnan cu e nivelnan mas halto di vulnerabilidad costal mundialmente, subrayando preocupacionnan creciente tocante e isla su exposicion na peligernan costal relaciona cu clima.
E estudio, publica den Nature Communications, ta presente un evaluacion global di vulnerabilidad costal usando datonan standardisa y un herment di midi ampliamente conoci como e Coastal Vulnerability Index (CVI). E investigacion ta evalua con suceptible e liñanan di costa ta pa peligernan manera erosion y inundacion, cu ta ser influencia mas y mas pa cambio di clima y subida di nivel di lama.
Segun e resultadonan, Aruba ta clasifica halto riba e lista mundial pa vulnerabilidad costero mediano, banda di paisnan manera Benin, Togo, y Sri Lanka, como tambe teritorionan bisiña di Caribe Bonaire, Sint Eustatius y Saba. E resultadonan ta pone Aruba riba hopi nacion costero mas grandi, halando atencion riba e riesgonan unico cu estadonan insular chikito ta confronta.
E CVI ta combina multiple indicador fisico cu ta influencia stabilidad di costa, incluyendo slope di costa, geomorfologia, haltura di ola, cambio relativo di nivel di lama y elevacion. Cada factor ta rcibi un puntuacion y ta ser combina pa produci un clasificacion di vulnerabilidad general cu ta varia di hopi abou pa hopi halto. Aruba su rango halto ta refleha un combinacion di elevacion abou di costa, exposicion na energia di ola, y buffernan natural limita den varios area costal.
Investigadornan ta enfatisa cu vulnerabilidad halto no necesariamente ta indica desaster inmediato, sino mas bien un sensitividad mas grandi pa peligernan costal den transcurso di tempo. Den caso di Aruba, e isla su economia, infrastructura y poblacion ta estrechamente mara na costa, aumentando e consecuencianan potencial di erosion y inundacion.
E estudio ta pone e situacion di Aruba den un contexto regional mas amplio. Na e escala usa pa e Panel Intergubernamental riba Cambio di Clima (IPCC), partinan di Caribe y parti nort di Sur America ta mustra vulnerabilidad costal eleva compara cu promedionan mundial. Islanan chikito ta ser particularmente afecta pasobra hopi biaha nan no tin e espacio, elevacion of recursonan pa adapta facilmente na condicionnan di costa cu ta cambia.
E autornan ta señala cu nan evaluacion ta basa riba datonan global disponibel actualmente y ta destina pa sostene planificacion a largo plaso en bes di reemplasa estudionan local. Nan ta recomenda pa paisnan sumamente vulnerabel usa e resultadonan ey como un punto di salida pa guia strategianan di maneho di costa, planificacion di adaptacion na clima, y inversion den medidanan di proteccion.
Pa Aruba, e resultadonan ta reenforsa e discusionnan andando tocante resiliencia di costa, desaroyo sostenibel, y adaptacion na clima. Autoridadnan local ya a reconoce e importancia di maneha erosion di playa, proteha rifnan di coral y mangelnan, y plania cuidadosamente desaroyo nobo di costa. E estudio ta agrega un perspectiva cientifico internacional cu por informa decisionnan di politica mas aleu.
Segun cu cambio di clima ta sigui influencia nivelnan di lama y dinamica di ocean, e investigadornan ta enfatisa cu planificacion proactivo lo ta esencial pa nacionnan costal vulnerabel. Pa Aruba, e estudio ta sirbi tanto como un advertencia como un oportunidad pa fortifica esfuersonan dirigi riba salvaguardia su liña di costa pa futuro generacionnan.
