Estudio ta mustra cu bahamento di peso den adulto mayor ta asocia cu e riesgo di morto

(FoxNews)—Segun un investigacion nobo, bahamento di peso den adulto mayor por aumenta e riesgo pa morto. Un estudio di grupo publica dialuna den e revista JAMA Network Open a studia mas cu 16.000 adulto na Merca y Australia.

E autornan di Universidad di Melbourne, Monash University y otro tambe a bisa cu a descubri cu bahamento di peso den adultonan mayor saludabel ta asocia cu un aumenta den riesgo pa cancer, malesa cardiovascular y “otro condicionnan cu ta limita bida.”

Dokternan mester ta na haltura di un bahamento di peso significante, specialmente den adultonan mayor masculino,” segun e estudio. Participantenan cu a wordo recluta entre maart 2010 y december 2014, tabatin 70 aña of mas di edad na Australia y 65 aña di edad na Merca. Analisis di data a wordo conduci for di april 2022 pa september 2022.

E pesa e adultonan tur aña, y investigadonan a taha dokter pa ta na haltura di un “asociacion significante” entre bahamento di peso chikito di mas cu 5% y mortalidad. Hende hombernan mayor cu a baha entre 5-10% di peso—compara cu esnan cu tabatin un peso stabiel—tabatin 33% mas riesgo di mortalidad, y esnan cu a baha mas cu 10% di peso tabatin 289% mas riesgo di mortalidad.

Hende muhenan mayor cu a baha entre 5-10% di nan peso tabatin 26% mas riesgo di mortalidad, y esnan cu a baha mas cu 10% tabatin 114% mas riesgo. E autornan a nota cu e observacion cu bahamento di peso ta asocia cu mortalidad entre hende homber por ta e resultado di e diferente caracteristicanan di e composicion di curpa di homber cu muhe. Por ehempel, hende homber tin un porcentahe mas halto di musculo cu grasa di curpa compara cu hende muhe.

Nan a bisa cu un splicacion “probabel” pa e descubrimento ta cu bahamento di peso por ta un indicador premonitorio di e presencia di varios malesa cu ta corta largura di bida, notando cu bahamento di peso den e grupo di edad aki ta asocia cu un reduccion den apetit. Esnan cu a subi peso no a mustra un aumento den riesgo di mortalidad den e grupo.

“Mester mas investigacion pa determina mas precisa e asociacion entre bahamento di peso y e comienso di malesanan fatal y si investigacion clinico of di laboratorio por identifica individualnan pa ken intervencion trempan por ta efectivo,” e estudio a bisa.