Recien Bon Dia Aruba a ser acerca pa un mayor preocupa pidiendo pa ayudo den aclara nomber di su yiu homber, Daniel Mazzolini di 12 aña di edad. Segun e mayor a splica na nos, imagennan di su yiu homber a surgi den prensa riba red social, eroneamente acusando e di comete vandalismo na Centro di Bario Dakota.

Tabata un di dia normal pa Daniel: El a caba di haci su tareanan boluntario na Butterfly Farm y a bay entrenamento di ajedrez na Centro di Bario Dakota. Pa 4:30 di atardi, el a sali pafo wardando su mama bin busk’e. Wardando, el a nota un heki di e centro cu ya tabata vandalisa, y a dicidi pa purba drech’e por medio di dobla e wayanan back den luga. Sin cu e tabata, e ayudo inocente aki lo causa e centro y un plataforma noticiero conoci riba nos isla pa acus’e eroneamente di vandalismo.

Den un entrevista cu Daniel y su mama, Silvia Mazzolini, e hoben a conta nos cu nan a haya sa di e asunto aki via un potret tuma for di un video di camara di seguridad. Ora nan a mira grabacion di camara di seguridad, a nota cu e tabata mustra diferente—e video tabata den blanco y preto y tabata mustra claramente Daniel purbando di drecha e heki. E potret tuma di Daniel no tabata cuadra cu e video. “Kisas tabatin un persona scondiendo un caminda,” Silvia a recorda. Segun a splica, e presidente di e club di ajedrez a conta e mama cu un security guard a saca un potret di Daniel.

Despues a surgi riba e pagina di e centro di bario e imagen di Daniel cu un peticion pa keda atento cu e persona aki (Daniel) pasobra ya el a vandalisa e centro dos biaha caba, segun e publicacion a bisa e tempo ey.

E proximo dia, e noticia aki tambe a sali riba un otro medio di comunicacion riba red social, atrobe usando e potret di Daniel y reiterando e peticion di e directiva di centro di bario.

Silvia ta recorda cu ora e asunto aki a surgi, maneho di Butterfly Farm a tuma contacto cune expresando preocupacion cu a acusa Daniel di comete vandalismo. Inmediatamente el a yama e hefe di operacion di e club di ajedrez, cual a yama e presidente y a organisa un reunion rapidamente cu e famia.

Pa loke ta e publicacion di e medio noticiero, e mama di Daniel a conta nos cu a tuma contacto via email cu e noticiero puntrando pa kita e publicacion mirando cu tabata un mal entendimento. Despues di no haya contesta, el a haya number di un reportero trahando pa e noticiero y segun el a conta, e reportero a bisa cu e lo tuma contacto back cune. Sinembargo, Silvia nunca mas a haya contesta di dje, ni a haya ningun disculpa publico y un declaracion pa atende e eror aki—aunke e medio si a kita e publicacion.

Silvia a expresa cu e asunto aki a lag’e un poco preocupa, como cu Daniel ta relativamente conoci den comunidad y tabatin miedo cu hende lo asumi lo peor di su yiu homber, sin conoce ken e ta di berdad.

Pero ken ta Daniel Mazzolini?

Daniel Mazzolini, un hoben di 12 aña bibando na Aruba, a nace y crece na Italia. Durante e ultimo añanan, Daniel a construi un bida defini pa talento artistico, trabao boluntario y iniciativa personal, sosteni pa scolnan, institucionnan cultural y organisacionnan ambiental rond e isla.

Desde 2012, Daniel a colabora cu Studio Murano Art, unda el a cuminsa siña e tecnica di supla glas. Den su tempo liber, e ta asisti e equipo di studio y ta contribui na actividadnan diario mientras e ta sigui desaroya su habilidad y sensitividad artistico.

Hunto cu experiencia, Daniel a expande su conocemento di arte di glas por medio di participa den un serie di tayer na Terrafuse Aruba, unda el a siña lampworking. Den e contexto aki, el a crea cralchi di glas, cual despues el a usa pa traha cadena y armband pa bende na amigo y famianan.

Daniel su trayecto artistico a ser sosteni consistentemente pa The Butterfly Farm, cual a duna su trabao visibilidad por medio di exhibi su piedranan pinta y creacionnan di glas.

Durante e ultimo aña, Daniel a sigui expande su portofolio por medio di pinta riba canvas, experimentando cu diferente tecnica y estilo.

Pero arte ta apenas un parti di Daniel su compromiso. Igualmente importante p’e ta su responsabilidad pa yuda y cuida otro y medio ambiente.

Daniel ta haci trabao boluntario regularmente na The Butterfly Farm y ta participa den iniciativanan di Ban Lanta Planta, incluyendo plantamento di mangel y limpiesa riba beach.

Daniel tambe a resalta den academia y ajedrez. Na fin di su prome semester di 2025-26, el a ricibi dos reconocemento di e International School of Aruba:

· Sustainability Award

· Honor Roll Award

Na mesun momento, Daniel ta sigui avansa den ajedrez ambos riba nivel nacional y internacional. El a representa Aruba den competencianan afo y consistentemente e ta resalta como un di e top hungadornan den competencia. Por ehempel, recien el a participa den e competencia di Betico Croes y a keda na segunda luga.

Pues Daniel ta un mucha extremamente balente, y ta resalta como un ehempel di creatividad, compromiso y participacion activo den comunidad—no como un persona cu a comete vandalismo.

Aunke e situacion desafortunado a ser resolvi, y e centro di bario a corigi su declaracion inicial, e caso aki ta subraya en particular e falta di etica ora ta trata di contenido envolviendo menor di edad, specialmente di parti un medio noticiero.

Den e declaracion di e centro di bario, ta parce cu no a identifica Daniel como un mucha menor di edad, sino a asumi cu esaki ta trata di un homber adulto cu a comete vandalismo—aunke por nota cu ta trata di un mucha mirando e pañanan cu Daniel tabatin bisti. Na momento cu a haci e publicacion aki, no a menciona Daniel pa nomber, pero si a acus’e—sin evidencia concreto—cu e tabata cometiendo vandalismo.

Y esaki ta trece un dilema dilanti cu por ta dañino na personanan inocente y ta mina e responsabilidad di medionan di noticia riba nos isla.

Como medio di comunicacion, specialmente responsable pa provee informacion critico pa comunidad di Aruba, etica mester keda central. No mester normalisa cu, manera den caso di Daniel, un mucha menor di edad ta lanta un dia mira su potret riba red social cu e palabranan “vandalismo” conecta cune. Di parti e medio noticiero envolvi, lo mester a atende e situacion mas adecuado—por lo menos un disculpa formal na e famia envolvi.

Pues ta spera cu e caso di Daniel lo por ta un “wake-up” na tur medio di comunicacion y un recordatorio di nos posicion den comunidad y e responsabilidad cu medionan noticiero ta carga.