(AP) — Union Europeo (EU) ta spera dialuna pa sigura bienes di Rusia cu ta warda den Europa te ora cu e pais trece un fin na su guera na Ucrania y compensa su bisiña pa e dañonan grandi cu el a causa durante casi cuatro aña.
E paso aki ta un etapa importante cu lo permiti lidernan di EU den un cumbre e siman cu ta bin pa discuti con pa usa dies biyones di euro den bienes di Banco Central di Rusia pa garantisa un prestamo grandi cu lo yuda Ucrania cubri su necesidadnan financiero y militar durante e proximo dos aña.
Prome minister di Hungria Viktor Orban — e aliado mas cerca di presidente Ruso Vladimir Putin den Europa — a acusa e Comision Europeo, cu a prepara e decision, “di viola ley Europeo sistematicamente.”
Un total di 210 biyon euro ($247 biyon) den activonan di Rusia ta congela den Europa. E gran parti di e fondo — rond di 193 biyon euro ($225 biyon) na fin di september — ta warda na Euroclear, un agencia financiero Belga.
E placa a ser congela bao di sancionnan cu EU a impone riba Rusia pa e guera cu el a lansa dia 24 di februari 2022, pero e sancionnan aki mester ser renoba cada seis luna, y tur 27 pais miembro mester aproba nan pa esey pasa.
Hungria y Slovakia ta opone duna mas apoyo na Ucrania.
E decision cu ta anticipa pa dialuna, cual ta basa riba reglanan di tratado di EU cu ta permiti e bloc protege su interesnan economico den cierto situacion di emergencia, lo preveni nan blokia e renobacion di sancionnan y lo hacie mas facil pa usa e activonan.
Orban a bisa riba red social cu esey ta nifica cu “e estado di ley den Union Europeo ta yega na su fin, y lidernan di Europa ta surpasa e reglanan.”
Den un carta na presidente di Conseho Europeo Antonio Costa, ken lo presidi e cumbre cu ta cuminsa 18 di december, prome minister di Slovakia Robert Fico a bisa cu e lo rechasa respalda cualkier paso cu “lo inclui cubri gasto militar di Ucrania pa e añanan cu ta bin.”
El a adverti “cu e uso di activonan Ruso congela por pone den peliger directamente e esfuersonan di paz di Merca, cu directamente ta conta riba e uso di e recurso aki pa reconstruccion di Ucrania.”
Pero e Comision Europeo ta argumenta cu e guera a impone gastonan grandi door di subi prijs di energia y frena crecemento economico den EU, cual ya a provee casi 200 biyon euro den apoyo na Ucrania.
Minister di Exterior Frances Jean-Noël Barot a describi e paso cu ta anticipa como “un decision grandi cu sin duda lo influencia e curso di e guera y acelera paz.”
E decision tambe lo preveni cu e activonan por ser usa den cualkier forma sin aprobacion Europeo. Un plan di paz di 28 punto cu a ser dirigi pa enviadonan di Merca y Rusia a stipula cu EU lo libera e bienes congela pa uso di Ucrania, Rusia y Merca. E plan ey a ser rechasa pa Ucrania y su sostenedornan den Europa.
Belgica, unda Euroclear ta basa, ta opone e plan di “prestamo di reparacion.” El a bisa cu e plan “ta implica riesgo economico, financiero y legal significativo,” y a yama otro paisnan di EU pa comparti e riesgo.
Entretanto, Banco Central di Rusia a bisa dialuna cu el a entrega un demanda den Moscu contra Euroclear pa dañonan cu, segun e, a ser causa ora Moscu a ser prohibi di maneha e activonan. Euroclear a nenga pa comenta.
Den un declaracion separa, e Banco Central tambe a describi plannan mas amplio di EU pa usa activonan Ruso pa yuda Ucrania como “ilegal y cu ta den contra di ley internacional,” argumentando cu nan viola “e principio di inmunidad soberano di activonan.”
