(AFP)—Aunke nan ta cauteloso pa no ser involucra directamente den e guera entre Merca y Israel contra Iran, paisnan Europeo ta ser hala aden den e conflicto toch despues di atakenan riba Chipre y aliadonan Occidental den e Golfo.
Mientras nan ta enfatisa cu nan meta ta “defensivo”, varios pais Europeo awor a priminti asistencia militar na miembro di Union Europeo, Chipre, mientras e conflicto den Medio Oriente ta intensifica y expande.
Algun tambe ta permiti e ehercito di Merca usa nan basenan bao di cierto condicion, manera no usa nan pa lansa bombardeonan.
“Nos no ta den guera y nos no kier uni nos mes na e guera,” prome minister di Italia, Giorgia Meloni, a bisa emisora RTL 102.5 diahuebs.
Aki ta e promesanan principal di asistencia militar for di Europa te awor:
Gran Bretaña
Un drone sin piloto fabrica na Iran a dal e pista di aterisahe di e base di forsa aereo Britanico na RAF Akrotiri na Chipre dialuna.
Otro dronenan, probablemente lansa pa e grupo militar Hezbollah cu respaldo di Iran for di Libanon, a ser intercepta.
Como reaccion, Gran Bretaña a bisa cu e lo manda un barco di guera, HMS Dragon, equipa cu sistema di misil Sea Viper cu por lansa ocho misil den menos di 10 seconde.
Tambe ta desplegando helicopter Wildcat equipa cu misil Martlet cu por deriba dronenan.
Separadamente, prome minister Keir Starmer a bisa diahuebs cu cuatro avion di combate Eurofighter Typhoon lo ser manda pa Qatar.
Inicialmente Starmer a rechasa participa den e guera, pero despues el a acepta un peticion di Merca pa usa dos base militar Britanico pa un “proposito defensivo specifico y limita”.
E rechaso inicial di Starmer a provoca critica di presidente di Merca, Donald Trump.
“Esaki no ta Winston Churchill cu ken nos ta tratando,” Trump a bisa diamars.
Francia
Francia ta manda su porta-avion principal — Charles de Gaulle— pa e Mediteraneo oriental.
Riba e barco tin 20 avion di combate Dassault Rafale hunto cu dos avion radar E-2 Hawkeye.
Presidente Frances Emmanuel Macron tambe a bisa cu Paris lo manda unidadnan adicional di defensa aereo pa Chipre.
El a bisa cu e “avion Rafale, sistemanan di defensa aereo y avion radar” ta ser desplega den e region.
Francia ya a manda su fragata French frigate Languedoc cerca di Chipre.
E barco a usa su misil Aster pa deriba dronenan lansa for di Yemen pa rebeldenan Houthi cu ta alia cu Iran, cual tabata apunta riba barconan den Lama Cora na december 2023.
Francia a bisa cu avionnan militar di Merca a ser permiti di usa e base aereo Istres Air Base na Francia cu “garantianan completo” cu nan no ta involucra den atakenan riba Iran.
Grecia
Grecia a manda dos fragata y cuatro avion di pelea F-16 Fighting Falcon pa Chipre.
Tambe a permiti Merca usa su base na Souda Bay na Crete.
Italia
Italia a bisa cu lo manda “recursonan naval” pa Chipre den e dianan binidero hunto cu Francia, Hulanda y Spaña.
Italia tambe a priminti “sistemanan di defensa aereo, anti-drone y anti-misil” pa partnernan den Golfo.
Medianan Italiano a reporta cu e asistencia por inclui e sistema di defensa aereo SAMP/T.
Minister di Defensa Guido Crosetto a bisa cu basenan aereo di Italia por ser usa pa Merca pa “sosten logistico” pa “avionnan cu no ta destina pa combate” bao di acuerdonan existente.
Portugal
Gobierno di Portugal a duna luz berde pa Merca usa su base di Lajes Air Base den Azores como parti di operacionnan cu ta apunta riba Iran, pero solamente bao di cierto condicion.
Prome minister Luis Montenegro a bisa diaranson cu a duna permiso “cu e comprension cu e operacionnan aki ta defensivo of di represalia, cu nan ta necesario y proporcional, y cu nan ta apunta exclusivamente riba obhetivo militar”.
Spaña
Prome minister di Spaña, Pedro Sánchez, a laga cla su oposicion contra e guera durante un discusion verbal cu Donald Trump.
Madrid a descarta permiti ehercito di Merca usa basenan di Spaña, loke a provoca un menasa di Trump pa corta tur laso comercial cu Spaña.
Sinembargo, Spaña a bisa cu lo manda su fragata mas avansa — Cristóbal Colón (F105) frigate — pa protege Chipre.
Ministerio di Defensa a bisa diahuebs cu e barco di guera lo “ofrece proteccion y defensa aereo” y “duna sosten na cualkier evacuacion di civilnan”.
