ORANJESTAD – Pa aclamacion, actual lider di partido politico Movimento Electoral di Pueblo (MEP), a re-eligi Evelyn Wever Croes pa lidera e partido pa 4 aña mas.
E desicion aki a cay algun dia prome den seno di partido, aproba pa fraccion actual di e partido y tambe conseho di partido. Durante e congreso diadomingo anochi den Cas di Cultura, esaki a tuma lugar y a keda ratifica. Normalmente ta eligi un lider durante e congreso. Den combersacion cu e presidente organisador di e congreso Rudy Richardson a splica nos colaborador na Noticia Cla, e hecho cu a dicidi pa aclama Wever como lider atrobe, no a kita afo cu si esnan den sala kier a tene un eleccion pa otro persona, esey tabata posibel. Sinembargo esey no tabata necesario, ya cu mayoria a dicidi pa e aclamacion. Awe mainta publicamente Wever a gradici pa e honor aki. “Danki pa bo sosten den mi persona un biaha mas, pa lidera nos prestigioso partido” Wever a bisa dialuna mainta den un mensahe cortico.
