–Sr. Dennis Burke presidente di Centro di Bario Playa Pabou ta anuncia cu pa 15 aña consecutivo cu Centro di Bario Playa Pabou lo ta celebrando Dia Internacional di Derecho di Mucha, cual ta tuma luga riba diadomingo dia 20 di november. Pa motibo cu e ta cay riba diadomingo cual ta mesun dia cu Sinterklaas lo ta yegando Aruba, directiva a dicidi pa organisa e dia aki riba diabierna dia 18 di november.
Sr. Burke ta anuncia cu mescos cu tur aña e prome 400 muchanan cu yega Centro di Bario Playa Pabou lo ricibi un regalo chikito e aña aki. Cual lo ta un tas cu e derecho di muchanan skirbi riba dje. Sr. Burke ta encurasha tur mucha pa bin trempan ya cu e 400 tasnan lo caba hopi lihe segun Sr. Burke.
Mas actividad
Sr. Burke ta pidi pa tur mucha bin cu nan zwembroek of zwempak ya cu riba programa tin diferente slides entre otro un waterslide, lo tin diferente trampolin y actividadnan manera pintamento di cara cu ta un actividad masha gusta pa e muchanan segun Sr. Burke. Tambe Sr. Burke ta informa cu entrada y tur actividad lo ta completamente gratis.
Actividad nobo
Sr. Burke ta informa cu un actividad nobo cu lo tuma luga e aña aki ta e actividad di hotwheels. Orario pa inscribi pa e actividad di hotwheels lo ta riba dia 15 di november, di 5or pa 6or y dia 16 di november di 5or pa 7or. Sr. Burke ta pidi pa tur mucha cu kier participa na e actividad di hotwheels pa bin trempan na tempo ya cu e cantidad di auto cu por wordo inscribi pa participa ta limita. Tambe mester menciona cu pa mas of menos 5or y mey lo cuminsa cu e fiesta oficial. Aki lo tin un brassband, caminda tur mucha lo ricibi sea un sombre, fluit of mascarada pa asina celebra Dia Internacional di Mucha na Centro di Bario Playa Pabou.
Tambe Sr. Burke ta sigui informa cu di 6or pa 8or lo pasa pa un show di hoben pa hoben, na unda diferente grupo di baile hubenil manera Kids 2 Kids Dancers, Candylicious Dancers y hopi mas, lo haya oportunidad di duna nan presentacion. Sr. Burke ta duna danki na nomber di directiva di Centro di Bario Playa Pabou na esnan cu a sponsor e actividad aki cual ta: CEDE Aruba, VNO ( Vertegenwoordiger van Nederland in Aruba), y tambe ATHA ( Asociacion Trabao di Hubentud Aruba.
