E topico di salud mental ta uno cu ta ricibiendo hopi atencion actalemnte den comunidad Arubano. Cindy Jansen un hoben di 23 aña di edad ta lider di e proyecto “Every Mind Matters” cu ta enfoca ariba e ayudo pa hobennan cu ta bringando cu un of otro forma di problema di salud mental. Cindy ta conta nos e meta di e proyecto y e inspiracion su tras.

Cindy ta conta cu e proyecto mes a cuminsa via di Cede Aruba cu a organisa e proyecto “Pitch Time”. Den esaki tin diferente proyecto y un di nan ta enfoka ariba e tema di Salud Mental, y Cindy a tuma e proyecto aki den su man y converti esaki den un exito. “E no tabata poni completamente kico mester haci pero ami a bin cu un team grandi mi tras cu ta yudando mi cu esaki y nos tur hunto a bin cu e nomber di Every Mind Matters”, el a bisa.

El a splica cu e meta principal di a proyecto aki ta pa yuda y guia e hobennan entre 14 pa 20 aña di edad mirando cu mayoria di e hobennan ta pidiendo ayudo di un of otro manera, pero tin biaha esaki no ta wordo mira y ora cu algo mester pasa ya e ora ta laat pa reacciona.

“Nos meta ta pa a bin cu e parti di support group (grupo di apoyo) pa asina sinta cu e hobennan y papia cu nan, bao guia di e profesionalnan cu nos tin cu ta yudando nos, pa asina yuda nan pa nan no ta nan so. Porta mayoria di nan tin problema y nan no sa ken pa aserca, nan kier bay Respaldo pero tin un lista largo pa nan ricibi ayudo, dus e ora nan por bin serca nos y sinta den grupo pa e diferente sesionnan cu nos tin, nan ta bin sinta serca nos y ricibi e ayudo cu nan tin mester tambe”, Cindy ta indica.

Every Mind Matter ta un poryecto cu ta basa ariba a un support group caminda e hobennan ta sinta den grupo y combersa ariba e diferente topiconan cu ta cay den e tema di salud mental. Cindy ta conta cu te cu siman pasa diasabra tabatin 10 hoben y e siman aki a bin 2 hoben extra.

Aworaki tin 2 grupo di seis y e hobennan ta sinta den nan grupo hunto cu e profesionalnan cu ta papia cu nan y guia nan den diferente caminda cu nan tin mester di guia. Den e sesionnan aki normalmente nan ta djis sinta y papia, pero ta bay tin diferente otro actividadnan cu lo mantene nan bezig tambe, Cindy a indica.

E sesionnan a cuminsa siman pasa diasabra, dia 30 di october, e sesionnan ta tur diasabra di 10or di mainta pa 12:30 merdia na YMCA Dakota. E ultimo sesion di e proyecto ta den schedule pa dia 11 di december.

“Dia 14 di december nos tin pensa di haci un expo day caminda por wak tur loke e hobennan a haci trece toch mas hoben dilanti cu ta willing pa ricibi ayudo. E siguiente edicion, si tur cos ta bon lo ta otro aña atrobe”, Cindy a agrega.

Cindy ta splica cu e team di Every Mind Matters ta consisti di 9 hoben, cu tambe ta sinta durante e sesionnan, y e psicologonan tey pa yuda y guianan e hobennan, pero tin hoben cu toch cu ta aserca e hobennan di e team pa papia. “Por ta nan no ta confia e psycologo di biaha y porta nan tin mas confiansa cu nos como hoben cu por tende nan y e ora nan ta conta nos y asina nos por yuda nan tambe. No ta solamente cu nos te y nan tey y nan no ta wordo yuda cu nada. Nos tin e parti di grupo, tin ta conta nan experiencianan cu nan ta pasando aden, dus pa nan wak cu nan no ta nan so den e probelma aki. Tin hopi mas hoben cu ta pasando den esakinan tambe”, el a bisa.

Por ultimo Cindy su mensahe pa comunidad y specialmente pa e hobennan ta: “No tene miedo, bo no ta bo so, hopi otro hoben cu ta pasa aden, cual cu nos no ta ripara esey te ora cu ta laat, pero tin mas hoben cu ta pasando aden, no tin miedo, aserca nos via telefon of nos Facebook of Instagram. Bin dilanti, porta no ta echt un problema di salud mental pero porta e tin gewoon ansiedad of e ta sinti tristo of den soledad, e por bin y asina nos por papia cu e por sinti mas open. E por haya amigonan tambe den e support group aki tambe cu e por confia y wak e no ta pasando su so den e problema. Dus no tene miedo y busca ayudo trempan prome cu ta laat”.

LEAVE A REPLY

Please enter your comment!
Please enter your name here