Ex director di AAA lo ta na Aruba pa yuda busca un solucion pa problema di filanan largo na aeropuerto

Recientemente riba medionan di comunicacion local a circula e noticia cu e ex director di Aruba Airport Authority (AAA) James Fazzio, ta regresa Aruba pa asina yuda drecha un di e problemanan cu ta afecta Aeropuerto Internacional Reina Beatrix, filanan largo di pasahero.

No ta un secreto cu aeropuerto ta encontra ainda cu filanan largo di pasaheronan, un problema cu mester di un solucion urgente. Recientemente, minister di Turismo, Wendrick Ciclia, encarga cu aeropuerto, a informa un medio di comunicacion local cu e kier busca un solucion pa e problematica aki.

Manera ta conoci, Gobierno di Aruba a firma un MoU (Memorandum of Understanding) cu Royal Schiphol Group (RSG) y ta den negociacion pa finalisa un acuerdo oficial pa continua cu e cooperacion. Un di temanan di negociacion ta e nombramento di un CEO pa AAA. Mientras cu ainda no a yega na e punto aki, AAA lo ricibi ayudo di ex CEO Fazzio cu lo regresa Aruba den representacion di RSG.

Segun informacion di un medio di comunicacion local, Fazzio a indica cu e lo ta na Aruba diahuebs di e siman aki y tin intencion pa keda te cu fin di luna. Segun informacion, durante e periodo cu e ta bay ta na Aruba yudando AAA, e lo conseha gobierno y aeropuerto y lo traha riba un solucion pa e problematica specifico aki, como tambe otro temanan cu ta rekeri di su atencion.

James Fazzio tabata e di dos director di Aruba Airport Authority (AAA) bou di e maneho di RSG, despues di Sr. Peter Steinmetz na 2014, ken a traha durante 10 aña como director di AAA. Na 2014 Fazzio a tuma over e maneho di AAA y a traha te 2019 como CEO di AAA. Despues cu el a bandona Aruba, el a regresa Merca na unda el a continua su trabou den e area di aeropuerto.

Na comienso di e luna aki minister Cicilia a ricibi un actualisacion riba e proyecto di Gateway 2030. Den un declaracion e mandatario a sigura cu gobierno tin atencion pa eleva e experiencia di e biaheronan na aeropuerto y a enfatisa cu e ultimo experiencia di e bishitantenan na aeropuerto no por perhudica henter e experiencia di calidad durante nan estadia.

El a indica cu a identifica diferente punto di atencion, entre otro e reto cu Departamento di Inmigracion Aruba a enfrenta, cual por causa cu filanan na aeropuerto ta tranca. El a agrega cu ademas di e retonan den Departamento di Inmigracion tin otro factor cu ta contribui na e filanan largo. E factornan aki ta inclui, entre otro, puntonan di seguridad den aeropuerto, limitacion di facilidad y infrastructura. E mandatario a subraya cu e ta trahando

duro hunto cu tur stakeholder pa eleva e experiencia di e biaheronan.

Apenas na comienso di e luna aki, riba e pagina di Facebook dedica specialmente na personanan cu ta bay bishita of cu a yega di bishita Aruba un bishitante a publica un potret den cual por filanan largo na momento cu e mester a bandona e isla. E turista aki a indica cu e proceso pa por yega na su gate pa subi avion tabata hopi fastioso y a tarda casi cuater ora.

“E experiencia na aeropuerto awe tabata un reto. Nos a yega 12or y apenas a yega na e prome punto di seguridad. Hendenan ta cay flauw door di calor y tabatin pleitamento cu personanan cu ta corta den fila. Nunca mi a wak e asina malo. Nos stima Aruba ainda, pero e aeropuerto mester di un actualisacion grandi na e banda di salida,” e turista aki a indica.

E biahero a menciona cu ta prome biaha cu nan ta sali di Aruba riba un diadomingo, compara cu den pasado unda nan ta biaha den siman, y el a indica cu e diferencia ta grandi.

E publicacion a ricibi mas di 300 comentario y reaccion. Varios otro usuario a ratifica e punto cu e aeropuerto mester di un actualisacion grandi.

Un bishitante frecuente di Aruba a indica cu e ta biaha tur luna, pero di su experiencia e ta sinti como si fuera cu e situacion ta keda empeora.

Otro usuario a comenta tocante su experiencia, cual el a describi como horibel. “Nan mester atende e situacion. E ta mesun malo manera cu e tabata añas anterior prome cu e aeropuerto nobo. Mester di mas hende y probablemente lo mester expande e aeropuerto. No tin necesidad pa hende warda tres pa cuater ora, specialmente den calor pa pasa security, inmigracion, etc…,” el a indica.

Otro usuarionan a menciona cu biaha den weekend, specificamente na momento di bandona e isla, ta un reto hopi grandi ya cu ta bira hopi druk locual ta contribui na filanan largo.

Pa algun e ta un situacion cu nan ta prefera di evita y por hasta ta e punto decisivo pa no scoge pa bishita Aruba un biaha mas. A pesar di e expansion di e check-in hall, e proceso di salida ta keda mescos, cual ta carga e esencia di e problema y cu mester di solucion urgente.