Ayera tardi, Corte den Prome Instancia di Aruba a dicta sentencia den e caso penal Tulipan, den cual ex minister Plenipotenciario Guillfred Besaril y ex director interino di Arubahuis Glenn Ling tabata acusa di malversacion oficial di casi 200 mil florin y abuso di nan posicion como ambtenaar. Ambos a keda condena.

Caso penal Tulipan ta regarda iregularidadnan financiero den Arubahuis na e momento cu Besaril tabata fungi como Minister Plenipotenciario y Glenn Ling como e director interino.

Segun corte, di e investigacion a keda proba cu ex minister Plenipotenciario Besaril a malversa placa door di laga Arubahuis paga pa e gastonan di uso di telefon priva, di vivienda y biahenan priva.

Ademas Besaril a haci uso di e carchi di banco di Arubahuis pa cubri gastonan personal y priva pa haci compras y come na restaurant. Tambe el a contrata un compania pa servicio di PR, cu ta pertenece na un conoci di dje, mientras cu Arubahuis tabatin un departamento di PR caba.

Hues a remarca cu Besaril, cu su actonan, a afecta e integridad di un instancia manera esun di Arubahuis y a enfatisa cu na momento di haci uso di placa di pais Aruba, e placa mester ser usa pa loke e tabata ser destina y no pa algo otro cu no ta relaciona cu su funcion y cu na final dia lo a duna un beneficio personal.

Manera ta conoci, e caso tabata consisti di cinco zaakdossier y durante e uitspraak hues a pasa riba e resultado di cada zaakdossier.

Pa loke ta e zaakdossier di Comunicacion (Communicatie), hues a splica cu a keda proba cu en berdad Besaril a laga Arubahuis paga pa recibonan di Setar di cable TV y internet registra na un adres priva.

 

Den e zaakdossier di Vivienda (Huurwoning) hues a splica cu gobierno a duna Besaril permiso pa usa e cas y pais Aruba a cubri un parti di e gastonan relaciona na e renobacion y mueblacion di e cas cu e ex minister Plenipotenciario a huur. Pa e punto aki el a haya vrijspraak.

Pa loke ta trata e resto di e gastonan cu a ser realisa relaciona na vivienda, cual ta inclui entre otro instalacion di un sistema di alarma, Besaril a ser haya culpabel di malversacion di 72 mil florin.

Den e zaakdossier di Dunamento di Servicio (Dienstverlening), hues a splica cu Besaril a usa placa di Arubahuis pa paga compania di PR, cu ta pertenece na un persona conoci di dje, pa servicio di PR; mientras cu Arubahuis mes tin un departamento di PR.

Pa loke ta e zaakdossier di su Estadia na Aruba (Verblijf Aruba), esaki ta relaciona cu e vakantie cu Besaril a tuma pa Aruba cu a cuminsa manera un vakantie personal, cu despues, segun Besaril, a converti den un biahe di trabao.

Hues a splica cu di e investigacion a keda proba cu Besaril a haci uso di placa di Arubahuis pa paga pa gastonan priva y pa beneficio personal. E suma cu hues a indica cu Besaril a malversa den e zaakdossier aki ta cinco mil florin.

Besaril a haya vrijspraak pa un punto di e zaakdossier aki, cual tabata e uso di e servicio di VIP, cual ta permiti pa ministernan haci uso di dje.

Den e zaakdossier di Uso di Debit Card di Arubahuis (Pin Betaling), hues a splica cu corte a haya cu den gran parti Besaril a haci uso di e carchi pa paga gastonan personal y priva y pa su propio beneficio. Hues a indica cu e suma malversa den e zaakdossier aki ta 47 mil florin.

Hues a splica cu Besaril a beneficia personalmente di e uso di fondonan di pais Aruba y Arubahuis. El a remarca cu el a laga Arubahuis paga pa su propio beneficio, pa cosnan priva y a mal usa su funcion y a mancha e integridad di Arubahuis.

Ademas el a subraya cu Besaril no parce di reconoce e seriedad di su actonan y tabata punta dede riba otronan.

Pa loke ta su condenacion, hues a splica cu a tene cuenta cu e puntonan pa cual el a haya vrijspraak y e hecho cu e no tin antecedente cu husticia, a dun’e un castigo mas abao di locual fiscal a exigi inicialmente.

Hues a condena ex minister Plenipotenciario Besaril cu 20 luna di prison, di cual 10 luna ta condicional y tres aña di prueba, kitando loke el a sinta caba den KIA.

Pa loke ta e caso di expropiacion, hues a indica cu Besaril mester paga mas di 138 mil florin y si no paga esaki, e lo ricibi un castigo di un aña di prison.

Ex director interino di Arubahuis tambe condena

Pa loke ta trata ex director interino di Arubahuis, Glenn Ling, hues a splica cu Ling tambe ta ser condena como sospechoso ya cu e tabata na altura di kico tabata pasando, pero no a reporta esaki. E no tabatin e caracter pa para Besaril y stop e di haci mal uso di fondonan publico.

El a remarca cu Ling no a cumpli cu su deber como director y a faya den mantene su responsabilidad.

Hues a indica cu el a tene cuenta cu Besaril a pasa riba autoridad di Ling den varios ocasion y cu e no a haya ningun beneficio financiero personal di henter e situacion aki. Ademas a tene cuenta cu Ling den corte a reconoce cu el a faya den su deber y responsabilidad y ademas hues a tene cuenta cu otro aspectonan.

Teniendo tur esey na cuenta Ling a ser condena cu 180 dia di prison, di cual 171 ta condicional, kitando e loke el a sinta caba, locual ta nifica cu su castigo ta cumpli caba. Ademas el a haya 200 ora di trabao comunitario y un periodo di prueba di tres aña. Si no cumpli cu e trabao comunitario, e lo ricibi un castigo di 100 dia di prison.