Segun noticiero Noticia Cla, a drenta e tristo informacion cu e ex parlamentario hopi conoci ken a forma parti di e partido AVP, Melvin Tromp, a fayece na Medellin Colombia.
Tromp tabata na Colombia pa ricibi tratamento di cancer di colon, un bataya cu desafortunadamente el a fayece. Aña pasa, el a ricibi e diagnostico cu e ta padece di cancer den su colon. Noticia Cla ta conta cu fin di siman el a bolbe Colombia, sinembargo ayera atardi el a perde e lucha.
Su persona tabata number 14 riba e lista di e partido AVP durante e ultimo eleccion. Tromp a cuminsa su carera na 2005, sigui pa aña 2009 y a participa den su ultimo eleccion den aña 2021. Prome cu su carera politico, e tabata traha na CEA.
Bon Dia Aruba ta desea consuelo y forsa na e familiarnan y sernan keri di e fayecido mandando palabranan di condolencia.
