Diabierna atardi Arestatie Team completamente arma a drenta den accion dilanti di Price Smart na Avenida Milo Croes caminda nan a detene Ex Politico John de Haseth hunto cu un otro persona. Segun declaracion di testigo na sitio, Arrestatie Team a tapa su wowo y hinc’e den un auto , mientras e otro hoben hunto cune a wordo tira abao, aresta y a bay cune den un otro auto.
Den un entrevista na Top Fm, sr. John de Haseth ta splica cu e ta sinti di basta dia caba cu e ta wordo vigila pa motibo cu su telefon tambe a cuminsa actua straño. Locual a sosode diabierna e ta splica den su entrevista cu sr Edmond Croes, e la simplemente hiba su amigo Price Smart manera un fabor pa e bay cumpra paar di cos. ”Si e amigonan ta haci nan ”cosnan straño” cu ami no tin prueba di dje, ami no por haci nada pe. Si bo bay duna bo bisiña un lift bay supermarket y nan ta buscando e persona ey, nan lo detene bo tambe” , sr. de Haseth ta bisa. Segun declaracion di testigo riba Facebook, hunto cu un video caminda bo por a mira e accion tumando luga, sr. de Haseth a keda den libertad paso no tabata e ta esun cu nan tabata buscando, sino e persona cu e la duna un lift pa Price Smart.
de Haseth no ta un sospechoso, Tabata buscando un otro persona
sr. de Haseth ta splica cu si nan tabata buscando cierto persona nan mester a bay cerca dje enbes di bay haci henter un drama y spanta hende manera si tin un persona cu ta canando arma y peligroso. ”Si e guy cu mi a transporta pa bay Price Smart ta esun cu nan tabata busca , nan mester a djis bay cerca dje anto busc’e. Esaki ta tur e informacion cu mi por trece cu respet na e investigacion cu ta andando”, sr. de Haseth ta bisa. E amigo a keda deteni y mester sigui su caminda pa atende su asunto segun reportahe di Top FM.
”Mi kier clarifica e asunto aki, Grupo 7 no tin nada di haber cu e asunto aki, y Grupo 7 no tin miedo di nada. Nos ta persona humilde, trahado como Arubiano y luchado pa hiba nos pais pa dilanti y pa pueblo tambe, ta pesey mi ta aki nan pa duna mi declaracion pa no bin cu polemica mañan cu de Haseth tabata cu arma y tur clase di cos riba dje. Nos no ta hende nan asina. Nos no mester tin miedo di nada, nos a coopera cu cuerpo policial y mi ta haci un gradicimento na sr. Jacobs di Atraco Team y tur otro instancia cu a trata mi tremendo , sr. de Haseth ta splica .
sr. de Haseth ta sigui bisa cu na e momento cu e la wordo deteni, e la informa atraco team cu e sa caba cu for di basta dia caba nan ta su tras. ”Mi telefon su GPS di su mes ta dal cende , kemen aki mi ta informa pueblo cu aki ta cosnan injusto. Mi a bisa nan, si nan tabata tin mester dimi nan por a djis yama mi anto mi lo a coopera cu nan y duna nan cualkier informacion, si no tin informacion, mi no por duna bo” sr. de Haseth ta bisa.
”Si mi lo a core di spanto, nan lo a tira mi mata”
sr. de Haseth ta splica cu e la coopera cu tur hende kende tambe a haci un tremendo trabao y cu tog e la ripara cu si e lo a reacciona diferente, kisas cos por a bay for di man ”si mi tabata un otro homber cu a tira piedra y sconde man, ta otro cos lo a sosode cu de Haseth,awe mi lo ta drumi na Shaba hunto cu e criminal nan”, sr . de Haseth ta bisa.
”Mi ta un homber cu a lucha duro, hasta polis a puntra mi si mi a yega di uza droga mi di cune, tende, mi a sali for di un team cual ta un Tour Operator mi tabata ta pa 28 aña largo, nunca di mi bida mi a uza, bende of cumpra droga.Mi a wordo lanta masha streng mes, nos ta un famia cu a traha semper y nunca a haya necesario pa bay den caminda nan malo” sr. de Haseth ta splica.
